Публикации » Ĕçрен хăраман хисеплĕ пулнă

Ĕмĕрне ĕçре пиçĕхсе ирттернĕ çын яланах хисеплĕ. Çак сăмахсенех Вăрманхĕрри Шăхалĕнче пурăнакан М. Цветкова пирки калас килет. Мария Павловнăн ĕçпе кушăхнă алли пурнăçра мĕн кăна курман-ши; Выльăх-чĕрлĕх пăхакан вăтăр çула яхăн пĕр улшăнмасăр «Труд» хуçалăхри сысна ферминче ĕçлет.

Сител хĕрĕн пурнăçĕ çамрăк чухнех çăмăлпа иртмен. Тăхăр ачаллă пысăк çемьере ытлă-çитлĕ пурнăçпа ÿсме майĕ те сахал пулнă. Çавăнпах ĕнтĕ Мария та Пăлапуç Пашьелĕнчи вăтам шкултан сакăр класс вĕренсе тухсанах ĕçе кÿлĕннĕ, тÿрех кирпĕч заводне вырнаçнă. Аслисемпе тан ĕçленĕ çамрăк хĕрача. Йывăрлăхран та хăраман, ÿркенсе те тăман. Каярахпа Первомайскинчи столовăйне вырнаçнă. Кондитер специальноçне те туххăмрах алла илнĕ. Шăпах çакăнта ĕçленĕ чухне Мария пулас мăшăрĕпе, Александрпа, паллашнă, çемье чăмăртанă, Вăрманхĕр-ри Шăхалĕнче çурт-йĕр çавăрса ача-пăчаллă пулнă.

Мария Павловна 1983 çултанпа сысна пăхнă çĕрте ĕçлет. Паян виçĕ витере çичĕ хĕрарăм тăрăшать. Коллектив туслă, пĕр-пĕрне ăнланса ĕçлеççĕ. Унчченхипе танлаштарсан чылай ĕçе механизациленĕ. Кăçалхи шăрăх çанталăкра выльăх апатне ытлă-çитлĕ хатĕрлеме услови пулсах пĕтмерĕ. Çапах та паян хуçалăх ку тĕлĕшпе йывăрлăхра мар темелле. Сыснасене çителĕклĕ типĕ çăнăх, витаминлă апат хутăшĕ параççĕ. Сыснасен талăкри ÿт хушаслăхĕ те начар мар, вилеслĕх шайĕ те пĕчĕк. Производствăри начар мар кăтартусене шута илсех ĕнтĕ Вăрманхĕрри Шăхалĕнчи Мария Павловна Цветковăна 2009 çулхи кăтартусемпе “Районти чи лайăх выльăх-чĕрлĕх пăхакан” хисеплĕ ята панă. Çак хисепшĕн виçĕ ача амăшĕпе пĕрле унăн çемйи те, ĕçтешĕсем те хĕпĕртеççĕ.