Публикации » ПАЛЛĂ МЕХАНИЗАТОРА АСĂНСА

Нăрваш Шăхалĕнче Раççей Федерацийĕн тава тивĕçлĕ механизаторне Л.Селиванова асăнса волейбол турнирĕ ирттересси йăлана кĕнĕ. Кăçал та ăна йĕркелерĕмĕр. Турнирта тăватă команда тупăшрĕç.

Пĕрремĕш тĕл пулу “Труд” хуçалăхăн виççĕмĕш бригада ĕçченĕсемпе ачасемпе çамрăксен Патăрьелĕнчи спорт шкулĕн вĕренекенĕсем хушшинче иртрĕ. Çивĕч тупăшура 2:1 шутпа ачасемпе çамрăксен спорт шкулĕн команди çĕнтерсе малалла вылярĕ. Çакăн хыççăн ăмăрту парачĕ иртрĕ. Кунта спортсменсене Нăрваш Шăхаль ял поселени пуçлăхĕ Н.Айкин, Нăрваш Шăхалĕнчи вăтам шкул директорĕ В.Платонова – ачасемпе çамрăксен Патăрьелĕнчи спорт шкулĕн директорĕ В.Платонов, Л.Селивановăн аслă ывăлĕ Геннадий Лаврович саламларĕç, çирĕп сывлăх, çемьере килĕшÿ, телей сунчĕç. Малалла ăмăртăва шкул ачисен командипе “Труд” хуçалăхăн пĕрремĕш бригадăри çамрăкĕсем тăсрĕç. Пуçламăш тапхăрта вĕсем тĕлĕнмелле чăтăмлăх кăтартрĕç: шут 32:30-па танлашрĕ. Пĕрремĕш бригада команди хăйсен шăллĕсене аран-аран çĕнтерсе финала хутшăнма ирĕк илчĕ. Тепринче шкул ачисем виççĕмĕш бригадăри яшсенчен выляса илсе виççĕмĕш вырăн йышăнчĕç.

Финалта пĕрремĕш бригадăри çамрăксемпе ачасемпе çамрăксен спорт шкулĕн команди вăй виçрĕç. Вăйă питĕ çивĕч те интереслĕ иртрĕ. Командăсем кашни мечĕкшĕн çине тăрса тупăшса очко хыççăн очко турĕç. Çапах та пĕрремĕш бригадăри çамрăксем 3:1 шутпа выляса илсе кăçал та турнирăн çĕнтерÿçисем пулса тăчĕç. Мала тухнисене укçа парса хавхалантарчĕç.

Юлашкинчен пĕр вăхăт механизаторта тăрăшнă В.Бородкин Л.Селивановпа В.Пагунов кукуруза акса çитĕнтерес ĕçре çитĕнÿсем туни пирки каласа пачĕ. Лавр Васильевич сеялкăна хăй урăхлатса пысăк тухăç пуçтарса кĕртме май туса панă. Ун патне çак çĕнĕлĕхе вĕренме республикăри ытти районсенчи механизаторсем те çÿренĕ. “Сельская жизнь” хаçатран та ятарлă корреспондент килсе Л.Селивановпа В.Пагунов ĕçĕ-хĕлне çутатнă. Пысăк çитĕнÿсемшĕн Лавр Васильевича “Раççей Федерацийĕн тава тивĕçлĕ механизаторĕ” хисеплĕ ятпа, Владимир Михайловича ВДНХ-н ылтăн меда-лĕпе чысланă.