Публикации » Сталинград паттăрне – Президент тавĕ

Иртнĕ шăмат кун пирĕн çĕр-шыв Сталинград хулинче нимĕç фашисчĕсене çапса аркатнăранпа 70 çул çитнине анлăн паллă турĕ. Ик çĕр куна тăсăлнă вут-çулăмлă çапăçусем пин-пин салтакăн çутă ĕмĕтне татнă. Çав çапăçуран таврăннă паттăрсем паян пирĕншĕн чĕрĕ палăк вырăнĕнчех. Республикăра пурăнакан икĕ пин ытла çын “Сталинграда хÿтĕле-нĕшĕн” медале тивĕçнĕ. Хальхи вăхăтра вĕсем пирĕн районта виççĕн пурăнаççĕ.

Район админстрацийĕн, ял тăрăхĕсен, социаллă службăпа обществăлла организацисен представителĕсем юбилей ячĕпе Сталинград ветеранĕсен килĕсенче пулса хисеплĕ çыннăмăрсене саламлаççĕ, пысăк çĕнтерÿшĕн, чăтăмлăхшăн тав тăваççĕ, Раççей Президенчĕн, Чăваш Ен Пуçлăхĕн саламлă открыткисемпе асăнмалăх парнесене парса чыслаççĕ.

Вăрçă пуçланнă çулхине Кзыл Чышмара пурăнакан Зайнулла Абитов 19 çулта пулнă. Юрра-кĕвве ăста каччăн усал хыпара ялти клубра, алăри купăспах илтме тивнĕ. Комсомол организацийĕн секретарĕ вăрçăн малтанхи кунĕнчех фронта каяс шухăш çуралнă-ха, анчах тĕрлĕрех сăлтавпа тăхтама тивнĕ. Çамрăк лейтенант 1943 çулхи январьтен пуçласа 1945 çулхи февральччен Кăнтăр Хĕвел Анăçпа Украина фрончĕсенче çÿренĕ, хаяр çапăçусене хутшăннă.

– Сталинградра асфальт çул хăйăра, чул çуртсем ишĕлчĕк купине çаврăнатчĕç. Этем юнĕ çырма шывĕ пек юхатчĕ... Аса илме те хăрушă. Никам та сывă юласса шанман... – аса илет Зайнулла пичче пурнăçĕн чи хăрушă саманчĕсене.

Вăрçă хыççăн хастар çамрăка тÿрех колхоз ертÿçи пулма шаннă. Каярахпа çу заводĕнче, тăван хуçалăхра нумай çул тăрăшнă. Пархатарлă ĕçшĕн тивĕçнĕ орденсемпе медальсем паян унăн кăкăрĕ çинче çуталаççĕ. Виçĕ ачипе унăн çемйисем мучине чун-чĕререн хисеплеççĕ, юратаççĕ.

Паллă кун ячĕпе шур сухала район администрацийĕн пуçлăхĕ Николай Глухов ăшшăн саламланă, нумай çул пурăнма çирĕп сывлăх суннă.