20 ноября 2018 г.
Районта ял хуçалăхĕнче тата тирпейлекен промышленноçра вăй хуракансен професси уявĕнче тĕрлĕ-рен чыс-хисепе тивĕçнисем йышлăн пулчĕç. Вĕсенчен пĕри- Ыхра Çырми ял тăрăх депутачĕ Александр Николаевич Иванов. Вăл тỹрремĕнех професси уявĕпе çыхăннă хастар мар, çапах та хисеплĕ çынсем умĕнче пысăк тава тата хисепе тивĕçлĕ паттăр. Ăна çак кун РФ МЧСĕн приказĕпе килĕшỹллĕн «Пушарти паттăрлăхшăн» медальпе наградăларĕç.
Çак ĕç Чăваш Ишекĕнче иртнĕ çулхи ака уйăхĕн 8-мĕшĕнче кăнтăрла пулса иртнĕ. Александр Николаевич предприниматель кулленхи ĕç ыйтăвĕпе хăйсен лавкки умĕнче тăрмашнă. Сасартăк инçех те мар шарт! та шарт! туса темĕн сирпĕнме пикеннĕ, вăйлă сас панă, тĕтĕм йăсăрланма пуçланă. Вăл тỹрех унта чупнă. Инкек йăтăнса тухнă вырăна çитсен ăна пĕр шухăш канăç паман: «Пушар! Çурта тепĕр темиçе минутран вут хăйĕн серепине ярса илме пултарать! Шалта çын пур-ши? Вĕсене çăлмалла...» - çакнашкал шухăшпа вăл тĕтĕме хирĕç кĕрсе каять, диван çинче ларакан утайман ватă инвалида урама илсе тухса лартать. Ун хыççăн тепĕр хутчен пỹрте чупса кĕрет, тĕтĕмпе тăнран улшăнма пуçланă кинемее (нумай пулмасть пурнăçран уйрăлнă, йывăр тăпри çăмăл пултăр) çăлать.
.- Çакна эпĕ хамăн паттăрлăх тесе шутламастăп. Ман вырăнти кашни çын инкеке айккинчен çеç пăхса тăмĕччĕ тетĕп. Ватăсен кирлĕ докуменчĕсене сыхласа хăварас тĕллевпе виççĕмĕш хут та çăра тĕтĕм ăшне кĕме пикентĕм, анчах алкумĕнчи маччаран толь, хăма татăкĕсем ỹк ме пикеннĕрен шиклентĕм- ĕлкĕрейместĕп пуль терĕм... Ун хыççăнах çурт çулăмпах çунма пикенчĕ...,- сăпайлăн çеç каласа парать депутат.
Инкеке никам та Пỹлĕхрен ыйтса илмест. Анчах та йывăрлăхра алă тăсса паракансене Турă пулăшатех. Вĕсем Чăваш Ишекĕнчи А. Иванов евĕр патшалăх наградине те тивĕçлĕ.
А. ЕГОРОВА
Источник: "Авангард" (газета Батыревского района)