27 марта 2018 г.
Ыхра Çырминче çуралнă Динар Карнеев ют тăрăхра телей шыраса çỹрес темен. Шкултан вĕренсе тухнă хыççăн 2005 çулта Патăрьелĕнчи професси училищине çул тытнă, механизатора вĕреннĕ. Аллине права илнĕ хыççăн çамрăк 2007 çулта "Жизнь" агрофирмăра ĕçлеме пуçланă. Аслăрах юлташĕсем техника вăрттăнлăхĕсене пĕлме пулăшни ăна хăй суйласа илнĕ профессипе вăй хума тата та ытларах хавхалантарнă. Çур аки вăхăтĕнче хĕвелпе пĕрле тăрса хире кайни те, акнă культурăсем чăшăл çеç шăтса тухни те каччăна савăнăç кỹнĕ.
Р. Санзяпов фермер хуçалăхĕ йĕркелесен Динар унта вăй хума пуçлать. Халь ăна руль умĕнче акара та, выльăхсене валли утă-улăм хатĕрленĕ чухне те, вырмара та курма пулать. Çулсем иртнĕçем кăтартăвĕсем те лайăхланса та лайăхланса пыраççĕ. Хăйне шаннă трактора та яланах таса та тирпейлĕ тытма тăрăшать. Техникăн чăхăмласси пулатех, ун пек чухне çийĕнчех юсать.
Ĕçлекенсемпе пĕр чĕлхе тупма пĕлнишĕн, юлташĕсене йывăрлăхра пăрахманшăн, палăртнă тĕллеве яланах пурнăçлама тăрăшнăшăн Динар коллективра хисеп çĕнсе илнĕ. Ĕçри çитĕнỹсемшĕн ЧР ял хуçалăх министерствин, район администрацийĕн ял хуçалăх, экономика, çĕр тата пурлăх хутшăнăвĕсен пайĕн, "Жизнь" агрофирмăн, Р. Санзяпов фермер хуçалăхĕн, Ыхра Çырми ял тăрăхĕн Тав, Хисеп хучĕсене тивĕçнĕ. Кăçал вара Динар ЧР Пуçлăхĕн стипендине илсе тăрать.
О. ПАВЛОВА
Источник: "Авангард" (газета Батыревского района)