27 октября 2017 г.
Тĕнчене çын пурăнас тесех çуралать. Кашнийĕн ĕмĕчĕ малашлăхлă. Çак сăмахсене хăйĕн тĕллевне пурнăçланă Мидхат Алимзянович Шакиров пирки каланăнах туйăнаççĕ. Çамрăкранах тăван тавралăха юратнă вăл, унăн ытамĕнче ỹснĕ, вăрман, çăл куç илемĕпе киленнĕ. Хăйĕн туйăмĕсене альбом çине ỹкернĕ.
Пулас художниксен выставки иртрĕ. Вăл виçĕ пайран тăчĕ. Унта Патăрьел, Шăнкăртам, Сăкăт вĕренекенĕсем, вĕрентекенĕсем хутшăнчĕç. Патăрьелĕнчи ăсталăх шкулĕнче ĕçлекен М. Шакиров, Шăнкăртамри Р. Чуварова, Сăкăтри В. Горбунов патне çỹрекен вĕренекенсен ĕçĕсем нумайăшне тĕлĕнтерчĕç. Н. Кудрявцева, Д. Ижедерова, Л. Пазюкова ỹкерчĕкĕсем мухтава тивĕçлĕ. Сăмах май çавна калас килет: М. Шакировăн вĕренекенĕ Р. Чуварова пултаруллă художник, учитель, малашлăхра паллă çын пулатех. Унăн вĕренекенĕсем те питĕ ăста ачасем. Мидхат Алимзяновичпа Радия Мансуровна районти ялсен гербĕсене тăвассипе ĕçлеççĕ. Шăмăршă районĕн ялĕсен гербĕсене те вĕсемех тунă. Сăкăтри ăсталăх шкулĕн ертỹçи В. Горбунов та питĕ пултаруллă художник. Унăн вĕренекенĕсем район, республика шайĕнчи выставкăсене хутшăнаççĕ, малти вырăнсене йышăнаççĕ.
Мидхат Алимзяновичăн ăсталăх çулĕ тĕлĕнмеллех. Пултаруллă художникăн 40е яхăн вĕренекенĕ ăста ỹкереççĕ. Вĕсенчен 3-шĕ _ ЧР Пуçлăхĕн стипендиачĕсем. Ирек Басыров, Виолетта Волкова, Алина Емельянова дизайнер, учитель-художник, музей сотрудникĕ пулса ĕçлеççĕ. Ирек архитектура, строительство вĕренỹ учрежденийĕнчен хĕрлĕ дипломпа тухнă.
Мидхат Шакировăн выставкисем тĕрлĕ хулара иртеççĕ. Вăл РФ тата ЧР тава тивĕçлĕ культура ĕçченĕ. Унăн ячĕ республика энциклопедине те кĕнĕ. Вăл РФ геральдика обществин членĕ, ЧР Президенчĕн грантне илнĕ. Нумай пулмасть кăна М. Шакировăн "Родная земля" ятпа иккĕмĕш кĕнеки тухрĕ. Малтанхи Ж. Сулейманов паллă сăвăç академикпа пĕрле пичетленнĕччĕ.
М. Шакиров художникăн тĕп тĕллевĕ _ ачасене çутçанталăк хитрелĕхне ăнлантарасси, ăна юратма вĕрентесси тата çакна альбом çине ỹкересси.
Р. КЕМЕТОВ
Источник: "Авангард" (газета Батыревского района)