11 ноября 2016 г.
Шупашкарти Наци библиотекинче кăçалхипе иккĕмĕш хут Пĕтĕм чăвашсен "Асам" кинофестивалĕ иртнĕ. Унта çĕнтерỹçĕсене 22 номинаципе хакланă. Гран-Прие жюри пĕр шухăшлă пулса пирĕн ентеше, Владимир Карсаков режиссера Ю. Скворцовăн хайлавĕ тăрăх ỹкернĕ "Сурăм хĕрĕ" илемлĕ фильмшăн пама йышăннă.
В. Карсаков Чăваш Ишекĕнче çуралнă. 1978 çулта Ыхра Çырминчи вăтам шкултан вĕренсе пĕтернĕ хыççăн ялти клуб ертỹçинче тăватă çул ĕçленĕ. 1982-1986 çулсенче Хусанти культура институтĕнче ăс пухнă. 1992 çултанпа чăваш телевиденийĕнче режиссерта вăй хурать. Вăл лартнă фильмсене телевиденипе час-часах кăтартаççĕ. "Атюç", "Юман" фильмсемшĕн Митта Ваçлейĕн премине илме тивĕçнĕ.
Источник: "Авангард" (газета Батыревского района)