17 июня 2016 г.
РАЙОНТА ырă йăла-йĕркесем сахал мар. Акă, Юхмапа Пăла тăрăхĕнче район кунне йĕркелени хăйне евĕр тепĕр, иккĕмĕш акатуй евĕрех пулса кайрĕ. Кăçал культурăпа кану, спорт уявĕ Ыхра Çырминче июлĕн 9-мĕшĕнче иртмелле. Ун чухне те кашни ял тăрăхĕнчи ĕç хастарĕсем, сцена ăстисемпе спорт паттăрĕсем, аякри хăнасем асăннă ял тăрăхне пуçтарăнĕç.
Вулакана пĕлме: чăн малтанах район ĕçченĕсемпе хăнасене Первомайскисем хăйсен хитре лапамне пуçтарчĕç. Ун хыççăн район кунĕ Турханта, Нăрваш Шăхалĕнче, Туçара, Пăлапуç Пашьелĕнче, Пикшикре, Çĕнĕ Ахпỹртре, Ишлĕре иртрĕ. Кăçалхи район кунĕн хуçисемшĕн опыт илмелли тĕслĕх пур темелле.
Источник: "Авангард" (газета Батыревского района)