25 марта 2016 г.
Йĕрке çумне йĕрке хушса умри хут çине пикенсе те тăрăшса шăрçалакан чăваш пики, Ишек хастарĕ С. Кулакова творчество каçалăкĕнче çĕнĕ çын мар. Тăван чĕлхепе литература учительници Патăрьел районĕн хаçатĕнче пуçласа сас панăранпа та чĕрĕк ĕмĕр çитрĕ. Çак сахал мар вăхăтра Светлана Пантелеймоновнан вуншар çеç мар, çĕршер хайлавĕ те "Авангард" страницисенче вырăн тупнă-тăр. Çине тăрса тăрăшакан, мĕн пур йывăрлăха парăнтарса хăй тĕллевне пурнăçлакан аслă категориллĕ вĕрентекен пушă вăхăта пуш параппан çапса ирттерекенсен йышĕнчен мар: пĕрмай çырать, çĕнĕ темăсем шырать, малалла ăнтăлать. Çак кунсенче çеç унăн творчествин архивне тепĕр çĕнĕ кĕнеки хутшăнчĕ. "Иртнĕ кунсен çути" ятпа пичетленнĕ тĕрленчĕксен пуххине икĕ ача амăшĕ кăçалхи Ĕç çынни çулталăкне халалланă. Çывăх вăхăтра вулакан аллине çакланакан "чун апачĕ" шăпах иртнĕ кунсен çути пурнăçра пуриншĕн те çул маякĕ пулнине уçса парать.
Источник: "Авангард" (газета Батыревского района)