10 февраля 2016 г.
Пурнăçра кашни çын хăйĕн вырăнне тупни пĕлтерĕшлĕ. Ку тĕлĕшпе эпĕ хама телейлĕ тесе шутлатăп. Шăпа мана 1980 çулхи ноябрĕн 4-мĕшĕнче "Авангард" хаçат редакцине илсе çитерчĕ. Тунтикун йывăр тесе хаклаççĕ пулин те ĕçĕмсем тỹрех кал-кал пуçланчĕç. Ун чухнехи хаçат редакторĕ А. Салмин мана тутарла чĕлхепе тухса тăракан хаçатăн редактор çумĕн должноçне шанса приказ çырчĕ. Парти системинчен редакцине куçса тỹрех творчествăра ăнăçу тума çăмăлах пулмарĕ. Тĕрĕссипе район хаçачĕ манăн куçа çеç мар, чуна та уçрĕ тесе калас килет. Журналистăн çăмăл мар тивĕçне эпĕ çак ĕçре 17 çул тăрăшса самай туйрăм. Ун чухне çыравçăсен ушкăнĕ паянхи пек пĕчĕк марччĕ. Куçаруçăсен пайĕнче çеç çиччĕн тăрăшаттăмăр. Унсăр пуçне кашни отрасльпе тепĕр пилĕк-ултă пай пулнă. Корректорсем, ятарлă фотограф... Çемье пысăк пулсан та питĕ туслă пурăнни паян кун та асран каймасть. Пĕр-пĕрне пулăшса, ăнланса, çав вăхăтрах шỹтлесе ĕçлеме епле кăмăллăччĕ! Вадим Сурков, Кави Юлдашев, Александр Плешков, Николай Васильев журналистсем (йывăр тăприсем çăмăл пулчăр) хăйсен юплĕ те итĕмлĕ чĕлхисемпе шỹтлесе работниксене мĕн чухлĕ "хăйма" çитермен-ши!
Халĕ, акă, эпĕ пиçсе тĕрекленнĕ, шухăшсемпе çирĕп- леннĕ, ăсăмпа пуянланнă тăван хаçатăмăр 85 çул тултарчĕ! Куратăп, савăнатăп: манăн чун апачĕ самай тĕрекленчĕ, çулĕпе шултăраланса пынăçемĕн сăнĕпе те çамрăкланчĕ! Эпĕ ĕçленĕ чухнехипе танлаштарсан тутарла тухса тăракан дубляж тиражĕ те икĕ хута яхăн ỹсрĕ. Çакă, паллах, чăн малтан çыракансен, журналистсен ĕçне вулакан хак пани, вĕсене хисеплени тесе шутлатăп. Юлашки вăхăтра хаçат содержанийĕпе те улшăнчĕ тесе пахалас килет: редактор, журналистсен, вулакансен ятарлă колонки, пĕрремĕш страницăри анонссем, район администрацийĕн пуçлăхне, унăн çумĕсене, çĕнĕрен суйланнă ял пуçлăхĕсене, депутатсене сăмах пани те ырă пулăм.
Творчествăра нихăçан та чикĕ çук. Çавăнпа та ĕçтешĕмĕрсене, вулакансене уяв ячĕпе саламланă май çĕнни патне пысăк ăнтăлу, паянхи проблемăсене çутатакан çивĕч шухăшлă материалсем çырма ăнăçу сунатăп.
Ринас ГАЙФИН, РФ журналистсен союзĕн членĕ.
Источник: "Авангард" (газета Батыревского района)