13 мая 2016 г.
Аслă Чементи вăтам шкулти акăлчан чĕлхине вĕрентекен Н. Кошелева çĕнĕ кĕнеке кун çути кăтартрĕ. Вăл "Вĕсен паттăрлăхĕ вилĕмсĕр" ятпа пичетленчĕ. Ăна автор Тăван çĕршывăн Аслă вăрçинче çĕнтерỹ тунăранпа 70 çул çитнине халалланă. Материалсене урокра та усă курма пулать, вĕсемпе класс тулашĕнчи мероприятисене ирттерме те вырăнлă. Кĕнекере Патăрьел районĕнчи вăрçă участникĕсем çинчен акăлчан чĕлхипе паха материалсем вуласа пĕлме пулать. Ытларах автор Аслă Чемен ял тăрă- хĕнче çуралса ỹснисене тĕп вырăн пама тăрăшнă. Н. Мулгачевăн фронтри çырăвĕсем паянхи кун та чиперех упранаççĕ. Кашнийĕ алла тытаймасть-çке вĕсене. Надежда Васильевна çакна пичет страницисенче кун кăтартнă.
Кĕнекере авторăн вăрçă çинчен çырнă сăввисем пур. Уроксен тата класс тулашĕнчи мероприятисен сценарийĕ- сем пичетленнĕ. Çавăнпа та çырнисен пуххи вĕрентекенсемпе методистсем, шкул ачисем, акăлчан чĕлхипе, тăван ен историйĕпе интересленекенсем валли вырăнлах.
Сăмах май çакна та палăртма кăмăллă, Шупашкарти "Новое время" типографинче пичетленнĕ ĕç Надежда Васильевнан иккĕмĕш кĕнеки. Малтанхине вăл З. Чабатова, Т. Митрофанова акăлчан чĕлхи вĕрентекенĕсемпе пĕрле калăпланăччĕ.
А. ИВАНОВА
Источник: "Авангард" (газета Батыревского района)