12 августа 2015 г.
Умра _ çĕнĕ вĕренỹ çулĕ. Ачасене пĕлỹ çуртне илемлĕ те хăтлă классенче кĕтсе илмелле. Шăпах çакăншăн тăрăшаççĕ те Аслă Чементи вăтам шкулта та. Паян кунта хĕрсех ĕç пырать. Пĕр ушкăн спортзал урайне сарать.
_ Ĕç лагерĕ йĕркелерĕмĕр. Унта аслă классенчи каччăсене явăçтартăмăр. Паянхи куна спортзал стенисене сăрланă. Чỹречисене улăштарнă. Электричество кĕртнĕ. Хĕрачасен тата арçын ачасен урока кĕме салтăнса тума улăштармалли пỹлĕмĕсем хатĕр. Спортзал урайне киввине кăларса çĕре тикĕсленĕ. Çĕннине сарма каштасем вырнаçтаратпăр,_ кăмăллăн калаçать физкультура учителĕ П. Макаров.
Чăнах та ĕç шавĕ тăрать. Юсава мĕн палăртнин 80 проценчĕ чухлĕ тунă тесен те юрать. Кану пирки шутламаççĕ те вĕрентекенсемпе ытти ĕçченсем. Ку ĕçре И. Капитонов рабочи, С. Бахмистров водитель, Г. Кошелевпа С. Фролов хуралçăсем, В. Мулгачев оператор çитĕнекен ăрăва хавхалантарса пыратех. Шкул директорĕ М. Медведева та ĕç тумĕпех. Пĕрлех Марина Викентьевна шкулти ытти юсав ĕçĕ мĕнле пынипе те паллаштарма тăрăшрĕ. _
20 кабинет пирĕн. Вĕренỹ çулне кашнийĕ хатĕр тесен те юрать. Пурне те илемлĕ сăн кĕртнĕ. Коридора сăнарăр та пулас. Асамат кĕперĕ евĕр çутă тĕссемпе усă курнă. Ăстаçисене аякка шырама каймарăмăр. Вуннăмĕшсем пĕртте ỹркенмерĕç. К. Убаськина, акă, паян та шкулта. Чăваш чĕлхипе литература кабинетне вăлах илемлетрĕ,_ каласа парать М. Медведева.
Çулленхи юсав ĕçĕсене пурнăçлама И. Матросовăн "Нико" предприятийĕ те пулăшать-мĕн. Çакăнпа кăмăллă шкул ертỹçи. Шăхачри И. Сулагаева штукатурка, шпаклевка тума пулăшать. Ял тăрăхĕнчи А. Матросов ертсе пыракан строительсен бригади те пулăшу пама ỹркенмест.
Г. Фролова, Л. Иванова, Н. Сорокина,О. Капитонова, С. Кошелева, Т. Егорова шкул ĕçченĕсем сăрлас ĕçе тỹрремĕнех явăçрĕç.
Ачасен вăйĕпе тăвайман ĕçсенче ашшĕ-амăшĕ курăмлă пулăшу парать. В. Тимошкин тракторпа сухалассине хăй çине илнĕ. Н. Пузайкин предприниматель те яланах алă тăсса пама хатĕр.
А. Сергеева класс ертỹçин (улттăмĕшсен) ашшĕ-амăшĕ те харсăр.
Йĕри-тавра çеçке ăшĕнче вĕренỹ çурчĕ. Каллех клумбисем тĕрлĕрен. Кашни класăн хăйне уйрăм-мĕн. Пуçламăш классенче вĕренекенсем те илеме хăнăхма вĕренеççĕ. Вĕсен те çĕр лаптăкĕ пур. Э. Селиверстрова ертсе пыракан класăн (саккăрмĕшсем) тĕслĕхлĕ. Эльвира Ильиничнан вĕренỹ пỹлĕмĕ те лайăх. Физикăпа пĕлỹ паракан Н. Зотовăпа акăлчан чĕлхине вĕрентекен Н. Кошелева та кабинечĕсене хăтлăх кĕртес тĕлĕшпе сахал мар ĕçлерĕç.
А. Астраханцева
Источник: "Авангард" (газета Батыревского района)