03 июня 2015 г.
УЯВА УЯВ ПЕК УЯВЛАРĕç Аслă Чемен.
"Айдуш" уçланкăра ял уявĕ иртрĕ. Аслă Чеменпе Тури Чакă ялĕсем пуçланнăранпа 408 çул çитнине паллă тума ватти те, вĕтти те хаваспа хутшăнчĕ.
Малтанхи кун Тури Чакăра çуралса ỹснĕ Н. Карзаков парнисемшĕн мини футболла вылярĕç. Тури Чакăри 10-мĕш округри çамрăксен команди (депутачĕ В. Кадушкин) кубок çĕнсе илме пултарчĕ.
Уява килнисене район администраци пуçлăхĕ Н. Глухов, ял тăрăхĕн ертỹçи Г. Медведев саламларĕç. Ялти обществăлла пурнăçа хастар хутшăннисене, тĕрлĕ çĕрте тăрăшакан пултаруллисене Хисеп хучĕсемпе парнесем тивĕçрĕç.
Иккĕмĕш кунхине уçланкăна кашни йăх мĕн пур тăванĕпе пуçтарăнчĕ. Малтанах сцена çинче ача садĕнче тăрăшакансем тата ялти культура çурчĕ çумĕнчи сцена ăстисем, "Ассорти" ташă ушкăнĕ юрă-ташăпа савăнтарчĕç. Ача садне çỹрекенсем, шкулта вĕренекенсем, хĕрарăмсен ушкăнĕ тус-тăванлăхпа юрату çинчен чăваш халăх юррисене шăрантарчĕç. Юлашкинчен пурте пĕрле вăйă картине тăчĕç.
Анат Туçа.
Шкул стадионне "Çимĕк каçĕн" уявне кăмăлтан пуçтарăнчĕç. Ăна ирттерес ыйтăва çĕклекенсем вара çамрăксем пулчĕç. Ĕçĕсене хăварса, инçе çула çывăхлатса чылайăшĕ тăван кĕтесе таврăннă, тăван-пĕтене, тус-юлташа, пĕрле вĕреннĕ тантăшĕсене курма васканă.
Уяв каçне пухăннисене Туçа ял тăрăхĕн пуçлăхĕ Н. Перепелкин саламларĕ. Харсăрсене хисеп грамотисемпе чысларĕ. Ун саламне район депутачĕсен Пухăвĕн депутачĕ П. Перепелкин, райадминистрацин оранизациллĕ тĕрĕслевпе кадр ĕçĕсен пайĕн начальникĕ С. Торговцев, Туçа ял тăрăхĕн депутачĕсем В. Сурковпа В. Кузнецов малалла тăсрĕç.
Таврана савăк юрă-кĕвĕ саланчĕ. К. Евруков, С. Лекарев чăваш эстрада çăлтăрĕсемпе Р. Перепелкин ентеш, "Дуняша" ушкăн, Глеб Беззубов çамрăк "артист" хăйсен пултарулăхĕпе тыткăнласа халăха кăмăлтан кантарчĕç.
Каçхине 10 сехетре вара тĕрлĕ тĕслĕ фейерверк çуталчĕ.
Источник: "Авангард" (газета Батыревского района)