07 марта 2015 г.
Çулĕсем шултăраланса пыраççĕ пулсан та Геннадий Яковлевич ĕçсĕр ларма юратмасть. Çавăнпах пуль выльăх-чĕрлĕхне те çителĕклех тытаççĕ.
Çăмăл пулман Г. Маназыповăн пурнăçĕ. Вăл иккĕре чухне ашшĕ Тăван çĕр-шывăн Аслă вăрçине кайнă. Яков Владимирович 1943 çулта Ленинград облаçĕнчи Бокситогорски районĕнчи Михайлово ялĕшĕн пынă çапăçура ĕмĕрлĕхех куçне хупнă. Амăшĕ, Натюк аппа (Наталья Николаевна), 3 пĕчĕк ачапа тăрса юлнă.
Аслă Чементи 7 класлă шкултан питĕ лайăх паллăсемпе вĕренсе тухнă хыççăн Гена Аслă Арапуçне çỹрет. Унтан вара 1957 çулта Куславкка районĕнчи Тюрлямари учетчик-счетовода хатĕрлекен пĕлỹ çуртне кĕрет. Вĕренсе таврăнсан ялĕнчи "Путь коммунизма" колхозра счетоводра ĕçлеме тытăнать. Çамрăк кăштахран хăйĕн пĕлĕвне Шупашкарти ял хуçалăх академийĕнчи зооинженери уйрăмĕнче куçăмсăр майпа тăсать. Диплом илсен колхозра зоотехникра тăрăшма пуçлать. Хăйне шаннă тивĕçе чунтан пурнăçлать. Хуçалăх аш-какай туса илессипе малтисен ретĕнче пулнă. Унăн пултарулăхне шута илсе ял халăхĕ Генадий Яковлевича хуçалăха ертсе пыма шаннă.
Г. Маназыпов обществăлла ĕçсене те хастар хутшăннă. Выльăх-чĕрлĕх отраслĕнче тăрăшнă чухнех колхозри парти, профсоюз комитечĕсене ертсе пынă, суйлавсене хастар хутшăннă, районти "Авангард" хаçат редакципе тачă çыхăну тытнă.
Геннадий Яковлевич мăшăрĕпе, Римма Васильевнăпа, 4 ывăлпа 1 хĕр çуратса ỹстернĕ. Ачисене пурне те тивĕçлĕ пĕлỹпе воспитани панă. Хĕрĕ Аслă Чементех тĕпленнĕ, шкулта вĕрентет.
Римма Васильевна 8 класс пĕтернĕ хыççăнах фермăра ĕçлеме тытăннă. Мĕн пенсие кайичченех унта тăрăшнă. "Чи лайăх сысна пăхакан" хисеплĕ ята та пĕрре мар илнĕ.
Паян Маназыповсем кĕçĕн ывăлĕн çемйипе пурăнаççĕ. Пурĕ вара вĕсен 10 мăнук.
А. ФРОЛОВ
Источник: "Авангард" (газета Батыревского района)