02 июля 2014 г.
Аслă Чементи С. Фролов фермер хуçалăхĕн 500 гектар çĕр. Сергей Николаевич кашни гектарпа туллин усă курма тăрăшать. Пĕлтĕр 100 гектар кĕрхи тулă акса хăварнă. Кăçал сĕлĕпе урпана та çавăн чухлех никĕсе хывнă. Çум курăкран гербицид сапнă, анасем таса. Кĕрхисем аванах çỹллĕ, çурхисем _ кĕскерех. Нỹр çитменни тỹрех сисĕнет. Хуçалăхăн ытти лаптăкне нумай çул ỹсекен курăксем йышăнаççĕ. Вĕсем юлашки çумăрсене пула аванах хăпарнă.
_ Курăк масси пĕлтĕрхинех çитмест, анчах мĕн пуррине пуçтарса кĕртмеллех. Эпир лашасем кăна усратпăр, вĕсен те шучĕ сахал: 10 пуç. Хĕл каçарма типĕ апат хатĕрлесе пыратпăр. Çавăн пекех çынсене те сутатпăр. Хамăр тăрăхран тата Первомайскинчен, Шăнкăртамран, ытти ялсенчен те килсе илеççĕ, _ тет С. Фролов.
60 гектарти курăка П. Ивановпа В. Тимошкин çулаççĕ, хăйсемех тавăраççĕ. Преслакан агрегатпа Ю. Фролов пуçтарса тăваткал пĕчĕк тюксем туса пырать. Ăна В. Чернов вите çывăхне турттарса тăрать. Ыттисем техника çине тиеççĕ тата купалаççĕ.
Нумай çул ỹсекен курăксене пуçтарса кĕртме уйрăм çынсемпе килĕшỹ тунă. Çавна май пур çĕрте те ĕç вĕресе тăрать.
Паян хуçалăха выльăх-чĕрлĕхсĕр аталанса кайма йывăртарах. Çакна шута илсе С. Фролов ăратлă сурăхсем ĕрчетес тĕллевпе пурăнать. Вĕсене усрама хуралтă пур. Сивĕ кунсенче мĕн çитересси пирки те пуç ватмалла мар: курăк çителĕклĕ. Çумăр çунине кура кĕлет тырăпа тулас шанăç та пысăк.
О. ПАВЛОВА
Источник: "Авангард" (газета Батыревского района)