28 мая 2014 г.
Кăçал Совет çарĕсене Афганистанран илсе тухнăранпа чĕрĕк ĕмĕр çитрĕ. Истори страницине çырăнса юлнă синкерлĕ пулăма халалласа районти ял тăрăхĕсенче, шкулсенче, коллективсенче сахал мар мероприятисем ирттерсе пыраççĕ. Сăмахран, çу уйăхĕн малтанхи кунĕсенчех Аслă Чемен ял тăрăхĕнче пурăнакансем вăрçăра пуç хунисене асăнса лартнă палăкпа юнашар кăвак чăрăшсем лартса хăварнă. Ял тăрăх пуçлăхĕ Гаврил Медведев тата каратэ енĕпе кĕрешсе икĕ хут Тĕнче чемпионĕ ятне çĕнсе илнĕ Николай Алешев пуçарăвĕпе йĕркеленĕ пархатарлă ĕçе ял хастарĕсем кар тухнă. Ешĕл йывăç тĕмĕсемпе тивĕçтерекенĕ те хăйсен ентешех _ халĕ Сĕнтĕрвăрринчи вăрман хуçалăхĕнче вăй хуракан Александр Дубинин. Аллейăна уçнă çĕре Патăрьелĕнчи Петр Федоров священник та хутшăнннă, тăван çĕр-шыв тулашĕнче салтак тивĕçне пурнăçланă Иван Кошелевăн амăшĕпе, Ольга Кошелевăпа пĕрремĕш чăрăша ырă кăмăлпа лартнă. Çĕнĕ хунавсем пурте çуркуннехи вăйпа йăл илсе тымар яччĕр çеç...
Паллă мероприятие Чечен вăрçинче темиçе хутчен пулма тỹр килнĕ В. Латышов, Г. Фролов запасри капитан та хутшăннă.
Халăхшăн ырă ĕç туни нихăçан та çĕре ỹкмест, манăçмасть. Тепĕр чĕрĕк ĕмĕртен паян лартнă чăрăшсен лăссисем самаях сулмакланĕç, тỹпенелле туртăнĕç. Афганецсен аллейи ун чухне Аслă Чеменсемшĕн ял илемĕ пулĕ.
А. НИКОЛАЕВА
Источник: "Авангард" (газета Батыревского района)