06 февраля 2018 г.
Çак чыс Хирти Пикшикри вăтам шкула тивĕçнĕ. Çĕнĕ автобус уççине И. Камалетдинов шкул директорне Чăваш Ен Пуçлăхĕ М. Игнатьев панă.
Çак сăлтавпа И. Н. Ульянов ячĕллĕ Чăваш патшалăх университечĕ умĕнче иртнĕ сумлă мероприятие халăх йышлă пухăннă. Раççей Федерацийĕн Правительствин йышăнăвĕпе региона 35 автобус килнĕ. Субъектсене вĕсене "Вĕренĕве аталантарас" патшалăх программипе килĕшỹллĕн панă.
Регион Пуçлăхĕ М. Игнатьев çак ĕçе Раççей Президенчĕ В. Путин пуçарăвне тĕпе хурса йĕркеленине асăннă. Раççей Правительстви, Чăваш Ен ертỹлĕхĕ ачасене шкула çỹреме условисем лайăх пулччăр тесе сахал мар тăрăшать. Патшалăх политикин тĕп приоритечĕсенчен пĕри пулса тăрать те вăл.
Техникăна çĕнетме республика хыснине çулсерен укçа-тенкĕ хывса хăвараççĕ. Кăçал çак тĕллевпе 16 млн тенкĕ уйăрнă тата тăхăр автобус туянма плана кĕртнĕ-мĕн.
Хальхи вăхăтра республика шкулĕсенче 341 техника. Вăл шутра пирĕн районти 22 автобус 36 ялтан шкулсене ачасене турттарать.
А. ИВАНОВА
Источник: "Авангард" (газета Батыревского района)