23 сентября 2015 г.
ÇАКĂН пек пуян çын (чăнласах та çапла калас килет) районта сахал. Хирти Пикшикре пурăнакан Нурлигаян Салахова хăйĕн 95 çулхи юбилейне пысăк хавхаланупа, савăнăçпа кĕтсе илнĕ. Вăрçă вăхăтĕнче пĕр ачапа тăрса юлнă салтак арăмĕ мăшăрĕ таврăнасса тăватă çул тилмĕрсе кĕтнĕ. Нурулла Халиулловичăн çутă ăраскалĕ пулнах. Тăван яла таврăнсанах вĕсем пурнăçа çĕнĕрен йĕркелесе янă, вунă ача çуратса çитĕнтернĕ, аслă çул çине кăларнă. Нурлигаян Зиннетулловна паян хăйĕн шăпишĕн Аслă Пỹлĕхĕмĕре тав тăвать. Кинемейĕн паян 20 мăнук тата 32 кĕçĕн мăнук! Вуннăмĕш теçеткере пыракан ватăна вĕсен ячĕ-шывне ас туса тăма та çăмăл мар-тăр. Çак кунсенче юбилейçă Раççей Президенчĕн Владимир Путинăн саламлă открыткине район ертỹçисен аллинчен илсен чăнласах та савăннă, вăхăтĕнче хуçалăхра ырми-канми тăрăшнă ĕçченсене сума сунăшăн тав тунă.
Источник: "Авангард" (газета Батыревского района)