20 декабря 2014 г.
Раштавăн 17-мĕшĕнче Хирти Пикшикри тата Пăлапуç Пашьелĕнчи культура аталанăвĕпе библиотека тивĕçтерĕвĕн центрĕсенче Раççей Федерацийĕн Президенчĕ 2014 çула ят панă Культура çулталăкне пĕтĕмлетнĕ.
Мероприятисенче район администраци пуçлăхĕ Николай Глухов тата Чăваш Республикин Патшалăх Канашĕн Председателĕн çумĕ Олег Мешков хутшăннă. Маларах асăннă культура "вучахĕсемшĕн" иртсе пыракан çулталăк пĕр йĕрсĕр иртмен. Чăваш Республикин Президенчĕн ялти культура учрежденийĕсене аталантармалли çинчен калакан 2007 çулхи тата кăçалхи июнь уйăхĕнче Чăваш Республикинчи культурăпа туризмри патшалăх политикине ăнăçлă пурнăçласа пыни çинчен калакан Указĕсемпе килĕшỹллĕн асăннă икĕ учреждение 400-шер пинлĕх сертификат парнеленĕ. Чыслă лару-тăрура тивĕçнĕ укçа-тенкĕ кĕвĕ, çутă аппарачĕсене, видеопроекторсене, компьютер оборудованине, сцена çине тухмалли тумсене пуянлатма кайĕ.
Сăмах май каласан, юлашки çулсенче çеç культура çурчĕсене модернизацилемелли программăпа килĕшỹллĕн Юхмапа Пăла тăрăхĕнчи сакăр учреждени хăйсен сĕмне улăштарнă. Çак ыйту малашне те пысăк тимлĕхре пулĕ..
Источник: "Авангард" (газета Батыревского района)