28 декабря 2013 г.
Хирти Пикшикри вăтам шкулшăн халăх умĕнче отчет тăвасси çĕнĕлĕх мар. Ку хутĕнче те ашшĕ-амăшĕн пухăвĕ акт залĕнче иртрĕ. Вăл хăйне евĕр-лĕ "Бикшики-минус" калаçать тата кăтартать" радио-концертпа пуçланчĕ. Сцена çинче ачасем ашшĕ-амăшне хăйсен юрри-ташшипе савăнтарма тăрăшрĕç. Уйрăмах Д. Салахова ертсе пыракан "Лейсян" хор тата Л. Данилова ертсе пыракан "Мерчен" фольклор ушкăнĕ пултарулăхпа тĕлĕнтерчĕ.
Шкул ĕçĕ-хĕлĕн отчетне Н. Хуснетдинов директор турĕ. Пысăк экран çинчи схемăсемпе диаграммăсем ĕç ăнăçлăхне кăтартрĕç. Воспитани енĕпе тăвакан мероприятисем çинче шкул директорĕн çумĕ Д. Салахова чарăнса тăчĕ. Унăн сăмахне аслă тата кĕçĕн классен канашĕсен, пĕрлешĕвĕн фотоотчечĕсем, илнĕ грамотăсемпе дипломсем те çирĕплетрĕç.
Ачасен хĕллехи каникулĕ пуçланать. Вăл усăллă ирттĕр текен ыйту та çĕкленчĕ. Çак вăхăтра шкулти тата ялти спорт залсем хупă тăмĕç. Вĕсенче ачасем канма та кулма та пултарĕç.
А. ПЕСТРОВА
Источник: "Авангард" (газета Батыревского района)