14 октября 2022 г.
Ишлĕри почта çыхăну уйрăмне Людмила Юркина ертсе пырать. Ку отрасльте вăл çĕнĕ çын мар, 20 çула яхăн ĕçлет. Çак кунсенче вара ăна тăрăшулăхĕшĕн, шаннă тивĕçе тỹрĕ кăмăлпа пурнăçланăшăн ЧР цифра аталанăвĕн, информаци политикипе массăллă коммуникаци министерствин Хисеп грамотипе чысланă.
- Ку грамота манăн тата пĕрлех почтальонсен ĕçне хаклани те. Коллектив туслă пулнăран, пĕр-пĕрне ăнланса вăй хунăран палăртнă тĕллевсене пурнăçлатпăр, - тет кăмăллăн Людмила Анатольевна.
Почта çыхăну уйрăмĕнче виçĕ почтальонка тăрăшать: Ольга Никифорова, Мария Григорьева, Людмила Михайлова. Вĕсем хаçат-журнал çырăнтарнисĕр пуçне вĕсене халăх патне çитерессишĕн, пенсипе тивĕçтерессишĕн кирек мĕнле çанталăкра та çула тухаççĕ. Аслă çулхисене электричествăпа, газпа усă курнăшăн тỹлеме те пулăшаççĕ.
(Хамăр корр.)
Источник: "Авангард" (газета Батыревского района)