23 июня 2020 г.
Мĕнле илĕртỹллĕ-çке вĕсем, шкул çулĕсем. Сисĕнмесĕрех иртеççĕ. Тăххăрмĕшсемпе вунпĕрмĕшсемшĕн аттестат илме те вăхăт çитрĕ. Кăçалхи чыслав мероприятийĕ хăйне евĕрлĕ те иртрĕ.
Ăшă çу кунĕ. Ачалăха, шкула чуна çывăх илĕртỹллĕ музыка янăрать. Патăрьелĕнчи пĕрремĕш вăтам шкулăн 9 класĕнчен кăçалхи вĕренỹ çулĕнче 85 ача тухрĕ. Вĕсенчен 13-шĕ "5" паллăсемпе çеç вĕреннĕ.
11 класра 52 выпускник. Вĕсенчен 15-шĕ вĕренỹре палăрнăшăн медале, 16-шĕ Мухтав хутне тивĕçнĕ.
Йăлана кĕнĕ чыслав саманчĕ каччăсемпе хĕрсемшĕн те, вĕрентекенсемшĕн те, ашшĕ-амă- шĕшĕн те пăлхануллă пулчĕ. Выпускниксене пурнăç çулĕ çине тухнă ятпа ăшшăн саламларĕç. Ашшĕ-амăшĕ педагогсен ĕçĕпе кăмăллă пулнине палăртрĕ. Ачасем шкул чысне çỹлте тытма пулчĕç, ашшĕ-амăшĕн ятне çĕре ỹкермессе шантарчĕç.
Г. КРАСНОВА
Источник: "Авангард" (газета Батыревского района)