13 ноября 2018 г.
Шупашкарта Пĕтĕм Раççейри ача-пăчапа çамрăксен çарпа патриотизмĕн "ЮНАРМИЯ" обществăлла юхăмĕн Чăваш Республикинчи уйрăмĕн слечĕ шайĕнче çарпа спорт вăййисем иртнĕ.
Вĕсене 63 команда хутшăннă. Вăйăсене 189 çам рăк явăçнă. Çак йышра Патăрьелĕнчи иккĕмĕш вăтам шкулта вĕренекенсем те пулнă. Командăна тăххăрмĕшĕнчи М. Сейфуллина, вуннăмĕш класри Н. Мазяковпа А. Алякин кĕнĕ. Ăмăртусен пĕтĕмлетĕвĕпе Юхма Ен чысне хутĕлекенсем республикăра пĕрремĕш вырăн йышăннă. Кубока, дипломсене, медальсемпе Хисеп хучĕсене тивĕçнĕ.
Вĕренекенсен тăватă тĕрĕслев витĕр каçма тỹр килнĕ. Граната ывăтассипе патăрьелсене çитекенни пулман. Пистолетран тата пĕчĕк калибрлă винтовкăран биатлон мишенĕсене тĕл перессипе 25 очко пухма май пур çĕртен каллех палăртнă нормăна тултарнă. Пилĕкшер отжимани тăвасси ачасене пĕртте йывăрлăх кỹмен.
Мария, Николайпа Артем çакнашкал ăмăртусене пуçласа хутшăнмаççĕ. Район чысне вĕсем шывра ишессипе те, акватлон, триатлон тупăшăвĕсенче те темиçе хутчен те хỹтĕленĕ. "Зарница", "Орленок" вăйăсенче те правур. 2013 çулта вĕсен ушкăнĕ федерацин Атăлçи округĕнче "Зарницăра" тăваттăмĕш вырăн йышăннăччĕ.
Çитĕнỹ тăрăшмасăр пулмастех. Ăмăртусене çулталăк тăршшĕпех хатĕрленмелле. Спортра пиçĕхсе ỹсни ачасене хăйсене те килĕшет. Малашлăхра вĕсем çар специальноçĕсене алла илес ĕмĕтлĕ.
Çамрăк ăрăва спорт вăййисене илсе каяканĕ тата хатĕрлекенĕ ОБЖ вĕрентекенĕ В. Антипов. Пĕрлех Виктор Львович районти "ЮНАРМИЯ" штабĕн начальникĕ те.
- Пĕрлешỹре 200 ытла ача шутланса тăрать. Вĕсен пурин те удостоверенийĕ те, форми те пур. Пĕри тепринчен пултаруллă, харсăр юнармеецсем. Тĕрлĕ ăмăртăва хутшăнаççĕ. Вĕсенчен ыттисен тĕслĕх илмелли пурах,-тет В. Антипов.
Ку хутĕнче мала тухнăскерсем те лайăх вĕренеççĕ, мероприятисене кăмăлтан хутшăнаççĕ. Акă, Н. Мазяков, Чăваш Ен Пуçлăхĕн стипендине илме тивĕçнĕ.
А. АСТРАХАНЦЕВА
Источник: "Авангард" (газета Батыревского района)