27 июля 2018 г.
Патăрьелĕнче кайăк-кĕшĕк грипне тупни, ăна чарса лартас тĕлĕшпе ирттернĕ ĕçсем пирки хаçатра çутатсах тăтăмăр. Çакна палăртса каламалла. ЧР премьер-министрĕн Иван Моторинăн хушăвĕпе килĕшỹллĕн çак чире пĕтерме, унпа кĕрешме, организациллĕ ытти ыйтусене татса пама ЧР Министрсен Кабинечĕн резерв фондĕнчен 138,7 пин тенкĕ уйăрса панă.
Районти выльăх-чĕрлĕх чирĕсемпе кĕрешекен ветеринари службин начальникĕ Петр Ефимов пĕлтернĕ тăрăх, комисси Патăрьелĕнчи Крепков урамĕнче 76 - 142 çуртсенче пурăнакансен чăх-чĕпне пуçтарса илсе çунтарнă хыççăн кашни хуçалăхри вите-сарайне дезинфекциленĕ, кил хуçисене тăкаксене саплаштарас тĕллевпе патшалăх ветеринари служби валли кирлĕ хутсене тăратнă. Çывăх вăхăтра вĕсен счечĕ çине укçа-тенкĕ куçĕ. Пĕр килограмм чăхшăн 55 тенкĕ те 60 пус параççĕ.
Источник: "Авангард" (газета Батыревского района)