17 июля 2018 г.
Анализ çирĕпленнĕ
Иртнĕ эрнере республикăра, çавăн пекех пирĕн районта та выльăх-чĕр-лĕх чирĕсемпе кĕрешекен ятарлă комиссин ларăвĕ иртрĕ. Вăл ЧР ветеринари лабораторийĕ тĕрĕслеме панă биоматериалта Патăрьел тата Комсомольски районĕсенче кайăк грипĕн А вирусне тупса палăртнипе çыхăннă. Çавна май июлĕн 12-мĕшĕнче район администрацийĕн Пысăк залĕнче чрезвычайлă лару-тăру тата санитарипе эпидемие хирĕç кĕрешекен комиссин анлă ларăвĕнче çак усал чире пĕрлехи вăйпа сирмеллине çивĕчлетрĕç. Анлă лару ĕçне район администрацийĕн пуçлăхĕ Рудольф Селиванов тата Чăваш Республикин Министрсен Кабинечĕн Председателĕн çумĕ - ял хуçалăх министрĕ Сергей Артамонов, район прокурорĕ Николай Осипов, ял тăрăхĕсен пуçлăхĕсем хутшăнчĕç.
Ларура районти выльăх-чĕрлĕх чирĕсемпе кĕрешекен станци начальникĕ П. Ефимов ку тĕлĕшпе районта мĕнле лару-тăру пулнă пирки пĕлтерчĕ: "Лаборатори чĕпсем грипран вилнине çирĕплетсен ветеринари служби тỹрех районти право хуралĕн сотрудникĕсемпе пĕрле Патăрьелĕнчи Крепков урамне икĕ енчен те контроль-пропуск пункчĕсене, дизбарьерсене йĕркелерĕмĕр, чĕпсем вилнĕ хуçалăхри хуралтăсемпе сарайсене дезинфекцилерĕмĕр, вилнĕ чĕпсене мĕн пур йĕркене пăхăнса çунтарса ятăмăр. Хальхи вăхăтра Патăрьелĕнче кашни кил хуçалăхне çитсех калаçу йĕркелетпĕр, хушма хуçалăхри кайăк-кĕшĕкне шута илетпĕр, вĕсене тĕрĕслетпĕр",-терĕ вăл.
Чире пĕрлехи вăйпа сирес тĕллевпе ял тăрăхĕсемпе пĕрлех районти ытти службăсене, район полицине те явăçтарнă. Роспотребнадзор управленийĕн Чăваш Республикинчи Патăрьелĕнчи уйрăмĕн начальникĕн тивĕçĕсене вăхăтлăх пурнăçласа пыракан С. Петрянкина тата РФ ШĔМĕн муниципалитетсем хушшинчи "Батыревский" уйрăмĕн начальникĕн çумĕ А. Алексеев, Патăрьел ял тăрăх пуçлăхĕ Н. Ялуков анлă ларура ку тĕлĕшпе мĕнле ĕçсем пурнăçласа пыни, усал чире сирсе ярас тĕллевпе халăхпа ăнлантару ĕçĕсем ирттерни пирки пĕлтерчĕç.
Комиссин анлă ларăвĕнче Сергей Артамонов яваплă службăсен кайăк грипĕн çулне пỹлессипе çыхăннă мĕн пур мероприятие вăхăтра тата пахалăхлă ирттермеллине çивĕчлетрĕ. Кун валли тинех нимĕнле иккĕленчĕк те çук. Биоматериалсене Владимир хулине тепĕр хут шанчăклăн тĕрĕслеттерме янă лаборатори анализĕ те çакнах çирĕплетнĕ. Апла пулсан асăннă чир чăх-чĕпе, хур-кăвакала ан ертĕр тесен, чăннипех те пурин те йĕркене çирĕп пăхăнмах тивет:
_ килти хуçалăхри кайăк-кĕшĕке урама кăлармалла мар;
_ грипп хăрушлăхĕ пур чухне кайăк-кĕшĕк туянмалла мар;
_ кайăк-кĕшĕке апат панă, вĕсен айсарăмне тасатнă чухне ятарлă тум-тир тăхăнмалла. Тасатнă чухне çиме, пирус туртма юрамасть;
_ енчен те кайăк виллине е чирленине курсан, патшалăх ветеринари службине пĕлтермелле.
Чылайăшне кайăк грипĕ этеме ерме пултарни те кăсăклантарать. Специалистсем çирĕплетнĕ тăрăх, çĕршывра çак амакпа чирленĕ тĕслĕх пулман. Çапах та çакă хăрушлăха сирмест. Районти медицина ĕçченĕсем чĕп хуçисен сывлăхне тĕрĕслесех тăраççĕ.
Районта - тĕп ветеринари инспекторĕ
Иртнĕ шăматкун, июлĕн 14-мĕшĕнче, çак ыйтупах пирĕн районта Чăваш Республикин Патшалăх ветеринари службин ертỹçи - Чăваш Республикинчи патшалăхăн тĕп ветеринари инспекторĕ Сергей Скворцов пулнă. Ĕçлĕ çул çỹрев вăхăтĕнче Сергей Скворцов район администрацийĕн пуçлăхĕпе Рудольф Селивановпа тĕл пулнă. Республикăри тĕп ветеринари инспекторĕ лару-тăрăва Чăваш Ен Пуçлăхĕ çирĕп тĕрĕслесе тăни пирки, çак ĕçе яваплă мĕн пур службăна явăçтармалли пирки каланă.
Вилнĕ чăхсенчен пробăсем илнĕ хыççăн грипăн А вирусĕ Комсомольски, Патăрьел, Елчĕк, Çĕрпỹ районĕсенчи хушма хуçалăхсенче палăрнă. Çавна май Республика Пуçлăхĕ Михаил Игнатьев чире сарăлма чармалли мероприяти (карантин) пирки хушу кăларнă.
Район администрацийĕн пуçлăхĕ Рудольф Селиванов районта кайăк-кĕшĕк грипне сарăлма парас мар тĕллевпе вăраха ямасăр кирлĕ мерăсем йышăннине палăртнă. Патăрьелĕнче вирус тупнă Крепков урамĕнче çийĕнчех эпизоотла лару-тăрăва чарса лартас тĕлĕшпе кирлĕ ĕçсене пурнăçланă, карантин çирĕплетнĕ, килĕрен çỹресе халăхпа ăнлантару ĕçĕсем ирттернĕ, кил хуçалăхĕнчи кайăк-кĕшĕке шута илнĕ тата ытти те. Çак тĕллевпе районти ветеринари службипе пĕрлех 19 ял тăрăхĕнчи работниксене те явăçтарнă. Районта чăх-чĕп сутассине, ăна илсе тухассине е илсе килессине чарнă. Чир-чĕр аталанăвне пайăрлатас тĕллевпе кайăк-кĕшĕкпе сутă тăвакансен чăх-чĕпĕсене те сăнасах, мониторинг ирттерсех тăраççĕ.
Вулакана пĕлме
Патăрьелĕнчи Крепков урамĕнче июлĕн 13-мĕшĕнчен (21 талăка) 76-мĕш çуртран пуçласа 124 çурт таранччен карантин зонине çирĕплетнĕ. Асăннă зонăра Чăваш Республикинчи Министрсен Кабинечĕн хушăвĕ тухнă хыççăн мĕн пур кайăк-кĕшĕке пуçтарса илеççĕ, сарайсемпе хуралтăсене дезинфекцилеççĕ. Çитĕнсе çитнĕ чăх-чĕпе е хур-кăвакала вара пуснă хыççăн 100 градуслă шывра пĕçерсен çеç усă курма юрать. Кайăк-кĕшĕк каяшне пăрахма юрамасть. Вĕсене пуçтарса çунтарса ямалла, мĕншĕн тесен грипп вирусĕсем ăшша та, сивве те лайăх чăтма, нумай вăхăт пурăнма пултараççĕ. Хальхи вăхăтра районта хăрушлăх кăларса тăратакан зона чикки 5 çухрăм шутланать. Унта Кивĕ Катек, Çĕнĕ Ахпỹрт, Пăлакасси, Козловка, Шăнкăртам, Тăрăн ял тăрăхне кĕрекен мĕн пур ялсем (Тăрăн, Кĕçĕн Патăрьел, Треньел) кĕреççĕ. Сăнаса тăракан зонăна вара 10 çухрăм чикĕре вырнаçнă ялсем кĕреççĕ: Хирти Пикшик, Тикеш, Еншик, Ыхра Çырми, Сăкăт, Тутар Сăкăт ял тăрăхĕсем, Туçа ял тăрăхне кĕрекен Вăтаел, Кивĕ Ахпỹрт, Туçа, Шăнкăртам ял тăрăхне кĕрекен Кзыл Камыш ялĕсем. Асăннă зонăсенче кайăк-кĕшĕке илсе тухмĕç, çапах та малашне те чăх-чĕпсен сывлăхне тĕрĕслесех тăрĕç.
А. НИКОЛАЕВА
Источник: "Авангард" (газета Батыревского района)