10 июля 2018 г.
Çемье, юрату тата шанчăклăх кунĕ умĕн район администрацийĕн ЗАГС уйрăмĕнче ырă хыпарсем пулсах тăнă. Июлĕн 5-мĕшĕнче Юхмапа Пăла тăрăхĕнче сас панă 150-мĕш пепкене регистрациленĕ. Шăнкăртамри Дамир тата Лейсен Алимовсен çемйине виççĕмĕш пепке - Сабина - хутшăннă. Çак кунхинех хăйсен савăнăçне Патăрьелĕнчи Сергейпе Марина Кудановсем тата Сергейпе Полина Хитровсем те пайланă. Телейлĕ мăшăрсене ЗАГС пайĕн ĕçченĕсем çемьене хĕр хутшăннă ятпа саламланă.
Пĕр кун маларах та районти Мăшăрлану керменĕнче савăнăçлă мероприяти иртнĕ. Ун чухне вара Шăнкăртамри Багмановсен çемйине йĕкĕрешсене - хĕрачапа арçын ачана - алла илнĕ ятпа саламланă. Пĕр варта выртнă Юсуфпа Ясмина çемьере виççĕмĕш тата тăваттăмĕш пепкисем. Вĕсем çут тĕнчене килнĕшĕн ашшĕ- амăшĕпе пĕрлех икĕ аппăшĕ те тем пекех хĕпĕртеççĕ.
Сăмах май каласан, июнь уйăхĕнче иртнĕ çулхипе танлаштарсан 4 пепке ытларах çуралнă.
Источник: "Авангард" (газета Батыревского района)