27 марта 2018 г.
Патăрьел халăх театрĕ ял çыннисен çывăх та юратнă тусĕ пулнине палăртса хăварас килет. Паянхи кун ăна Луиза Леонтьева режиссер ертсе пырать. Вăл икĕ пьеса çырса сцена çине кăларчĕ.
Кунта вылякан М. Галкин çамрăк пулин те республикăра иртекен конкурссене хутшăнса хăйĕн маттурлăхĕпе палăрчĕ. Артиста жюри членĕсем арçын рольне лайăх калăпланăшăн диплом тата Хисеп грамотипе чысларĕç. Çавăн пекех çакна та палăртса хăвармалла, иртнĕ çул Патăръел халăх театрĕ республикăра иртекен "Аван сцена" фестивальте Л. Леонтьева çырнă тата лартнă "Пурнăç пылак сахăр мар" драмăна кăтартса виçĕ хутчен Хисеп грамотине илме тивĕç пулчĕ .
2018 çула халăх театрĕ "Тинех лекрĕн капкăна" камитпе пуçларĕ. Çак спектаклĕн тĕп тĕллевĕ, шухăшĕ - пурнăçри çитменлĕхсене пĕтерсе малалла тĕрĕс пурăнма вĕрентесси.
Театр пурнăçĕнче камит жанрĕ хăйне евĕр уйрăм вырăн йышăнса тăрать. Ялсенче ăна питĕ юратса пăхаççĕ. Вăл сцена çине пĕрремĕш хут тухрĕ, залри халăх спектакль пуçланса вĕçне çитичченех алă çупни тата куракансен хаваслă кулли чарăнманни вĕсене килĕшнине палăртать. Унта вылякан артистсем куракана хайсен санарĕсене ăста та ĕненмелле выляни тыткăна илет те.
Çак кунсенче артистсем Пỹртлĕ, Пăлакасси ялĕсенче пулчĕç.Тĕп рольсенче вылакансем: Ваня - Марина Михайлова, Праски - Галина Ибетова, Тарье - Людмила Алешова, Пал-Палыч - Мефодий Галкин, Мишша - Юрий Езюков, Вĕçĕлес - Анисса Краснова, Рита - Ольга Леонтьева, Зина - Настя Петрова.
Патăрьелĕнчи культурăпа кану çуртĕнче çак спектакле мартăн-30-мĕшĕнче кăтартма палăртнă.
Ю. ЕЗЮКОВ. Патăрьелĕнчи культурăпа кану çурчĕн халăх пултарулăх енĕпе ĕçлекен методисчĕ
Источник: "Авангард" (газета Батыревского района)