27 февраля 2018 г.
Оборонăпа массăллă уйăхлăх вăхăтĕнче Патăрьелĕнчи пĕрремĕш вăтам шкулти кадетсемпе зарничниксем патĕнче А. Зиновьев генерал-майор пулчĕ.
Тĕл пулăва уçнă май район администрацийĕн пуçлăхĕ Р. Селиванов патриотла юхăм мĕнле аталанса пынипе паллаштарчĕ. Вĕренекенсем районти тата республикăри "Зарница", "Орленок" вăйăсенче пĕр хутчен çеç мар малти вырăнсене йышăннине, иртнĕ çул вара физкультурăпа ОБЖ вĕрентекенĕ, "Чăваш Республикин тава тивĕçлĕ учителĕ" Ю. Васюткин ертсе пынипе "Атăлçи Зарници" вăйăра пысăк çитĕнỹ тунине палăртрĕ. Пирĕн районтан та малашне генералсем тухасса шаннине каларĕ.
Шкул директорĕ Н. Андреева вĕренỹ заведенийĕ ачасене çарпа патриотла воспитани парас ĕçе мĕнле йĕркеленипе паллаштарчĕ. Республикăри ытти шкулсемпе танлаштарсан çакă курăнать: кадет класĕсенче вĕренме пирĕн хăш-пĕрисем евĕр пиллĕкмĕшĕнчен мар, пуçламăш классенченех пуçăнаççĕ. Тата пысăк ушкăнпа. Вăхăтĕнче çар службинче тăнă аслă юлташĕсем кадет класĕсен кураторĕсем пулни ачасене професси суйласа илес çĕрте те пулăшу кỹретех.
Чăваш Республикинчи Патăрьел тата Шăмăршă районĕсен çар комиссарĕ Е. Семенов вырăнта çарпа патриотла воспитани парасси тивĕçлĕ шайра пынине палăртрĕ. Çитĕнекен ăру палăксене тирпейлĕ тытса тăрас ĕçе явăçнине каларĕ. Ашшĕсем туса çитерейменнине ывăлĕсем шанчăклăн малалла тăсма пултарнине пĕлтерчĕ.
- Хăюллă, патвар, харсăр салтак пулас тесен шкулта вĕреннĕ чухнех маттур пулмалла. Мускаври тата республикăри "Сыны Отечества" юлташлăх пĕрлешĕвĕсем çитĕнекен ăрăва çарпа патриотла воспитани парас тĕлĕшпе сахал мар ĕç тăваççĕ. Офицерсен пухăвне хутшăнакансем Раççей Хĕç-пăшаллă Вăйсен ылтăн фончĕ шутланать. Камран тĕслĕх илмелли пур сирĕн. Тăрăшса çеç вĕренĕр. Спортпа туслă пулăр. Эпĕ те сирĕн пекех ялта, Пăрачкав районĕнче çуралса ỹснĕ. Вăхăтĕнче колхозра çĕр улми пуçтарнă, комбайнер пулăшуçи пулнă. Вăтам шкултан аттестат илсе тухнă хыççăн тата тăватă çĕрте пĕлỹ пухнă. Тĕрлĕ çĕрте служба тивĕçне пурнăçланă. Çар профессийĕ çăмăл мар. Ку енĕпе специалистсем кирлех. Тăван çĕршывăн хастар хỹтĕлевçи пулмашкăн хатĕрленĕр,- терĕ Александр Геннадьевич.
А. АСТРАХАНЦЕВА
Источник: "Авангард" (газета Батыревского района)