13 февраля 2018 г.
Районта оборонăллă-массăллă тата спорт ĕçĕсен уйăхлăхĕпе çыхăннă мероприятисем малалла тăсăлаççĕ. Ку тĕлĕшпе тĕрлĕрен çар чаçĕнче салтак службине ирттернĕ ветерансем те çулсеренех айккинче юлмаççĕ. Хальхинче вĕсем шăп та лăп Тăван çĕршыва хỹтĕлемелли кун - нарăсăн 23-мĕшĕнче- Патăрьелĕнчи пĕрремĕш вăтам шкулта ĕçпе вăрçă ветеранĕ, Мухтав орденĕн тулли кавалерĕ Александр Порфирьевич Табаков (йывăр тăпри çăмăл пултăр) ячĕллĕ кубока çĕнсе илессишĕн волейбол турнирне йĕркелеме палăртнă. Пĕлтĕрхи ăмăртăва чикĕ хуралçисем, моряксем, Германинче службăра тăнисем, çарпа десант, строительство, ракета çарĕн хастарĕсем тата ыттисем те хутшăннă.
Сăмах май каласан, А. Табаков - "Районăн хисеплĕ гражданинĕ" ята пуçласа тивĕçнĕ. Ăна çак титула 1998 çулта панă. Александр Порфирьевич нумай çул Патăрьелĕнче хуçалăх ертỹçи, улма-çырла питомникĕн, професси училищин, ВДПОн директорĕнче ĕçленĕ. Спортпа туслă пулнă, волейболла ăста вылянă.
Источник: "Авангард" (газета Батыревского района)