12 декабря 2017 г.
Ĕмĕр ĕмĕрлесси никамшăн та уй урлă каçасси çеç мар. Ватлăхра хисеплĕ ятпа, пархатарлă сумпа савăнса пурăнасси вара пысăк чыс! Иккĕленместĕп: сакăр теçетке çула хыçа хăварнă ĕç ветеранĕсем çакна кашниех çирĕплетме пултарĕç.
- Чун канăçне ĕçре, коллективра, тус-юлташ хушшинче тупнă ырă вăхăтсем тахăш самантра çĕмрен пек хăвăрт иртсе кайрĕç. Вĕсем пурте аса илỹре çеç çырăнса юлчĕç... - пăлханса калаçать çак кунсенче çеç 80 çул тултарнă И. Кириллова.
Ираида Александровна Куславкка хулинче çуралса ỹснĕ. Шăпа вара ăна Юхмапа Пăла тăрăхĕнче тĕплентернĕ. Вăл Патăрьел каччипе çемье çавăрнă (шел, мăшăрĕ 37 çул каяллах çĕре кĕнĕ). Акă мĕнлерех сыпăнса пынă унăн пурнăç çулĕ. Хĕрача вăтам шкултан вĕренсе тухнă хыççăн хăйĕн пĕлĕвне Канашри финанс техникумĕнче малалла тăснă. Çамрăк специалист алла диплом илнĕ-илменех Патăрьелĕнчи райĕçтăвкомăн финанс пайне ĕçе вырнаçнă. Вунă çула яхăн тăрăшнă вăл унта. Çав вăхăтрах вăл куçăмсăр майпа Хусанти финанспа экономика институтĕнче аслă пĕлỹ илнĕ. Малаллахи пурнăçĕ вара унăн ытларах (33 çул!) банк системипе çыхăннă: патшалăх банкĕнче кредит инспекторĕнче тăрăшнă, каярахпа унăн пултарулăхĕпе хастарлăхне кура банк управляющин должноçне шаннă. Тивĕçлĕ канăва кайичченех çав яваплă ĕçре тăрăшнă.
Пирĕн районта хисеплĕ ватăсене юбилей ячĕпе саламласси ырă йăлара. Çак кунсенче Ираида Александровнăна та район администрацийĕн пуçлăхĕ Р. Селиванов, Патăрьел ял тăрăх пуçлăхĕ Н. Ялуков ячĕпе салам сăмахĕсене çитернĕ. Александр ывăлĕпе унăн çемйи, Ольгăпа Наталья мăнукĕсем, çывăх тăванĕсем, пĕлĕшĕсем те юратнă асламăшне, хисеплĕ тăванне, тус-юлташне пысăк юбилейпе саламласа мĕн пур ыррине çеç сунаççĕ.
А. НИКОЛАЕВА
Источник: "Авангард" (газета Батыревского района)