17 ноября 2017 г.
Тăван çĕр-шыва хỹтĕлеме каймалли кĕркуннехи призыв малалла пырать. Чỹк уйăхĕн 14-мĕшĕнче районти çар комиссарĕ Евгений Семенов çамрăксен тепĕр ушкăнне Конституци тивĕçне чыслăн пурнăçласа тăван яла хисеплĕ те пултаруллă салтак пулса таврăнма ырă сунчĕ.
Çар тумне тăхăнма хатĕрленекенсенчен пĕри Раççей Президенчĕн полкĕнче службăна ирттерме тивĕçнĕ Патăрьел каччи А. Лаврентьев .
Пулас салтака ăнăçу суннă май, манăн та унпа кĕске çеç калаçу пуçарма май тупăнчĕ. Александр Олегович икĕ аслă пĕлỹ илнĕ. Кăçалхи çулла вара вăл И. Н. Ульянов ячĕллĕ Чăваш патшалăх университечĕн юриспруденци факультетĕнчен питĕ лайăх паллăпа вĕренсе тухса хĕрлĕ диплома тивĕçнĕ. Сăпайлă та мал ĕмĕтлĕ каччă малтан Патăрьелĕнчи пĕрремĕш вăтам шкулта, каярахпа аслă вĕренỹ учрежденинче хăйне ăс-тăн тĕлĕшĕнчен çеç мар, ỹт-пĕвне те спортра пиçĕхтернĕ. Вăл вара харама кайман.
_ Президент полкне çакланас шухăш алла диплом илнĕ хыççăн çуралчĕ. Шанчăка нихăçан та çухатмалла мар теççĕ-çке. Ĕмĕтĕме пурнăçа кĕртес тĕлĕшпе нумай çирĕп комисси "али" витĕр тухма тиврĕ. Шанăçа тỹрре кăларма, çирĕп кăмăллă салтак пулма тăрăшăп...,- сăпайлăн çеç пĕлтерчĕ хăйĕн шухăшне Саша.
А. ЕГОРОВА
Источник: "Авангард" (газета Батыревского района)