10 ноября 2017 г.
Патăрьелĕнчи "Союз" пĕрлешĕвĕн заводне кĕрсенех тин пиçсе тухнă çăкăр шăрши сăмсана кăтăклать. Ятарлă сентресем çинчи кукăльсем, булкăсем, пĕремĕксемпе печенисем куçа илĕртеççĕ. Часах вĕсене районти Патăрьел райповĕн, уйрăм çынсен лаввкисене, Шăмăршă, Çĕпрел тăрăхĕсене, Чĕмпĕр хулипе облаçне, Шупашкарти "Заходи" лавккана илсе кайĕç. Юхмапа Пăла тăрăхĕнче хатĕрленĕ çимĕçсене ютра та юратсах туянаççĕ-мĕн.
Заводра талăкĕпех ĕç шавĕ тăрать. Виçĕ сменăпа кунта вăй хураççĕ. Пĕрисем çăкăр, теприсем кондитер изделийĕсене, виççĕмĕшсем пĕремĕк пĕçереççĕ. Пурĕ 41 çын ĕçлет. Вĕсем çулталăк пуçланнăранпа 297,9 тонна çăкăр-булка, 49,6 тонна кондитер изделийĕсене хатĕрленĕ.
_ Паян пирĕн конкуренци пысăк, çавна май пахалăхлă продукци пĕçерме тăрăшатпăр. Кукăльсем, печенисем тутлă та кăпăшка пулччăр тесен çăнăх та лайăххи кирлĕ. Эпир "Чăвашхлебопродукт" пĕрлешỹрен ăна туянатпăр. Çынсен кăмăлне шута илсе чи лайăххипе те, 1-мĕшпе 2-мĕш сортсемпе те усă куратпăр. Хĕвел тухăç халăхĕ кăмăллакан апатсене _ чак-чак, баурсак _ тăватпăр, мармеладпа киселе те халăх хапăлласах туянать. Кадрсем опытлă, нумайăшĕ кунта чылай çул вăй хураççĕ, _ тет "Союз" пĕрлешỹ директорĕ В. Софронов завод пурнăçĕ пирки каласа панă май.
Паян пĕр вырăнта тăпăртатса тăнипе малалла каяймастăн, ыттисен ĕç-хĕлĕпе те паллашмалла, конкурссене те хутшăнмалла. "Союз" пĕрлешỹ çаплах тăвать те. Кăçал "Чăвашсоюз" йĕркелекен конкурссене пĕрре мар çитнĕ, çĕнтерỹпе таврăннă. "Чи лайăх çăкăр-булка изделийĕсем" тупăшура "Селяночка" çăкăр, кĕлентăр малти вырăнсене йышăннă. "Чи лайăх кондитер изделийĕ" номинацинче Патăрьелсен мармеладне пысăк хак панă.
Самана пĕр вĕçĕм улшăнусем кĕртме ыйтать. Çăкăр заводĕнче конкурентсенчен юлас мар теççĕ, çавăнпах çитес çул кивелнĕ оборудованисене улăштарма тĕллев лартнă. Техника паркне нумай пулмасть çеç çĕнетнĕ. Куллен кăмакаран тин тухнă продукцисене тиенĕ ГАЗельсем çула тухаççĕ, халăха хăвăртрах тутлă çăкăр çитерме васкаççĕ.
О. БЕЛЬДЕКОВА
Источник: "Авангард" (газета Батыревского района)