09 июня 2017 г.
«Батревский» обществăра Патăрьел районĕнчи машинăпа ĕне сăвакан тата выльăха искусствăлла майпа пĕтĕлентерекен операторсен ăмăртăвĕ иртнĕ.
Унта «Труд», «Звезда», «Красное Знамя», «Родина», «Тойсинская», «Батыревский», «Исток» хуçалăхсен специалисчĕсем хастар хутшăннă.
Ĕне сăвакансен хушшинче пĕрремĕш вырăна — В.Киргизова /«Батыревский» АУО/, иккĕмĕшне — В.Михеева /«Исток» АФ/, виççĕмĕшне Н.Перепелкина /«Звезда» ЯХПК/ тухнă.
Ĕнесене пĕтĕлентерекенсенчен малти рете Р.Ахмеров /«Исток»/, К.Ульянова «Труд»/, В.Убеев /«Батыревский»/ йышăннă.
Конкурсантсен пĕлĕвĕпе ăсталăхне районăн чĕр чун чирĕсемпе кĕрешекен станцийĕн тĕп врачĕ П.Ефимов, И.Артамоновăпа З.Самакина ветврачсем, райадминистрацин тĕп специалисчĕ-эксперчĕ З.Телегина, хуçалăхсен зоотехникĕсем хакланă.
— Ĕнесене машинăпа сăвакан тата выльăха искусствăлла майпа пĕтĕлентерекен операторсем районти кашни хуçалăх аталанăвне тÿпе хывнине эпир лайăх ăнланатпăр. Çавăнпа вĕсен ăмăртăвне обществăра ирттерме май туса паратпăр, — терĕ «Батыревский» АУО директорĕ Петр Ялуков, хуçалăхра выльăх ĕрчетессине еплерех йĕркеленипе паллаштарчĕ.
— Çуллен ирттерекен çак ăмăрту конкурсантсен квалификацине ÿстерме пулăшать тата тĕрлĕ сăлтава пула унта хутшăнайман операторсене малалла туртать, — терĕ район администрацийĕн пуçлăхĕн заместителĕ — ял хуçалăх пайĕн ертÿçи Леонид Кузнецов, призерсене диплом тата парне пачĕ.
Юрий МИХАЙЛОВ
Источник: "Хыпар"