14 апреля 2017 г.
Патăрьелĕнчи Арбат лапамĕнче тĕрлĕ çар чаçĕнче службăра тăнă салтаксем хăйсен ветеранĕсене чыс та хисеп туса палăксем лартнă. Вĕсенчен пĕри _ сывлăш-çар хỹтĕлевĕн салтакĕсен ячĕпе çĕкленнĕ палăк. Çак кунсенче саманан тĕрлĕ тапхăрĕнче хăйсен Конституци тивĕçне пурнăçланă ветерансем ПВОшниксене хисеп туса лартнă монумент умне пуçтарăнчĕç. Хальхинче хамăр районта пурăнакансем çеç мар, Шупашкар, Каçал, Елчĕк, Шăмăршă, Йĕпреç, Çĕрпỹ тăрăхĕсенчен те инçе çула кĕскетсе килнĕ.
Уяв митингне пухăннисене Патăрьел ял тăрăх пуçлăхĕ Николай Ялуков, ПВО ветеранĕсен канашĕн председателĕ Сергей Шадиряков, ытти çар чаçĕсенче службăра пулнисем саламларĕç. Тухса калаçакансем хальхи вăхăтра çар тивĕçне пурнăçлакан çамрăксене тав турĕç, пурне те çемье ăшшипе телей, ăнăçу, тăнăç пурнăç сунчĕç. Чи хастаррисене Хисеп хучĕсемпе тата ятарлă медальсемпе чысларĕç.
Н. МАЗЯКОВА
Источник: "Авангард" (газета Батыревского района)