07 февраля 2017 г.
Патăрьелĕнчи агропромышленность техникумĕнчен çулсерен ĕç профессине алла илнĕ çамрăк ăстасем хатĕрленсе, пиçсе тухаççĕ. Иртнĕ эрнере çеç чыслă лару-тăрура рабочи специальноçне вĕреннĕ 92 каччăпа хĕре диплом илнĕ ятпа саламланă. Пурнăç çулне суйласа илме пулăшакан хытă хуплашкаллă документ яланхиллех икĕ тĕслĕ: кăвак тата хĕрлĕ. Механикпа тракторист, поварпа çĕвĕç пулма тĕллев тытнă сакăр вĕренекен вара чи ырă та ăшă сăмахсене тивĕçнĕ. Вĕсем вĕренỹ учрежденине "5" паллăпа çеç вĕçленĕ.
Хĕрлĕ диплома тивĕçнĕ студентсене техникум дирекцийĕпе пĕрлех район администрацийĕн вĕрентỹ, çамрăксен политики тата физкультурăпа спорт управленийĕн начальникĕ Ирина Рубцова, халăха ĕçпе тивĕçтерекен центрăн тĕп специалисчĕ Светлана Кошкина, "Красное знамя" хуçалăх ертỹçи Петр Никифоров тата ыттисем те саламланă.
Источник: "Авангард" (газета Батыревского района)