03 февраля 2017 г.
Республика Пуçлăхĕн çамрăксен творчествă- ри ăнтăлуне, çитĕнĕвне кура стипенди уйăрма йышăннă хушăвĕнче Патăрьелĕнчи пĕрремĕш вăтам шкулти хастар та маттур вĕренекенĕсемпе вĕрентỹçи те пур. Вĕсем: Анастасия Исливанова, Елизавета Кошкина, Ярослав Шадриков, Анна Шулепова тата Андрей Владимиров (сăн ỹкерчĕксенче) физкультура учителĕ.
Настя 11 класра вĕренет. Вĕренỹ отличници, обществăлла ĕçре те яланах кăтартуллă, тĕрлĕ конкурса хастар хутшăнать. Уйрăмах историпе, литературăпа, обществознанипе çывăх.
Лиза та вĕренỹ отличници. 11 класа çỹрекен хĕрача уйрăмах математика, физика, биологи, хими предмечĕсене кăмăллать. Районта иртекен кашни ăмăртурах унăн ячĕ малтисен ретĕнче.
Лизăн кашни çитĕнĕвĕ курăмлă. Районта, республикăра иртекен предмет олимпиадисене хастар хутшăнать. Пушă вăхăтра кĕнеке вулама юратать. Хăйĕн пултарулăхне çак шая хурса хакланăшăн çав тери хĕпĕртет.
Ярослав та алла аттестат илме хатĕрленет. Вăл волонтерсен юхăмĕн лидерĕ. Вĕренỹре пиллĕк- семпе çеç ĕлкĕрсе пырать. Шанса панă ĕçе яланах тĕплĕн пурнăçлать. Ярослав юлташĕсенчен ăс-тăнĕпе те, пултарулăхĕпе те, çирĕп кăмăлĕпе те уйрăлса тăрать.
Анна 10 класа çỹрет. Сăпайлă та яваплă хĕрача. Вăл обществăлла ĕçсене яланах хастар хутшăнать. Хими, обществознани, вырăс чĕлхи, биологи, математика предмечĕсене çăмăллăн шĕкĕлчет. Наука конференцийĕсенче çулран-çул тĕрлĕ секцинче малти вырăнсене йышăнать. Волейболла, баскетболла выляс енĕпе район чысне те сахал мар хỹтĕлет.
Андрей Николаевич стипенди илме матурлăхĕпе хастарлăхĕшĕн тивĕç пулнă. Чăваш патшалăх педагогика университетĕнчен вĕренсе тухсан ĕçлеме пуçланă вăл шкулта. Аслă, опытлă юлташĕсенчен илнĕ сĕнỹсене ăша хывса ĕçлет. Пурнăç çулĕ çине тухма хатĕрленекенсене кирлĕ воспитани парас тесе вăй хурать. Районта, республикăра иртекен спорт ăмăртăвĕсене хастар хутшăнать.
О. КАЛЛИНА
Источник: "Авангард" (газета Батыревского района)