17 января 2017 г.
Эпир кашниех хамăра килĕшекен професси суйласа илме тăрăшатпăр. Мĕншĕн тесен ĕçе юратса, килĕштерсе вăй хурсан çеç унăн тухăçĕ палăрмаллах ỹсет, çын хăйне телейлĕрех туять, шалăвĕ те тивĕçтерỹллĕ пулать-çке. Патăрьелĕнчи иккĕмĕш вăтам шкулăн 9 класĕнче вĕренекенсем ял хуçалăх техникумне çул тытрĕç. Вĕсенчен хăшĕсем çакăнта пĕлỹ пухма шухăш тытаççĕ, теприсем ăçта вĕренме каймаллине палăртман, иккĕленсе тăраççĕ.
Шкул ачисене техникумра вĕренекенсем те, вĕрентекенсем те ăшă кăмăлпа кĕтсе илчĕç. Малтанах директор çумĕ В. Петров ял хуçалăх техникумĕн историйĕпе, çитĕнĕвĕсемпе паллаштарчĕ. Камсене тата мĕн вăхăт хатĕрлени çинче тĕплĕн чарăнса тăчĕ. Вĕреннĕ хушăрах хушма специальность илме май пуррине те ăнланчĕç ачасем. Çак специалистсем хулара та, ялта та, хăть ăçта кайсан та, килте те кашни утăмрах кирлĕ. Хĕрсемпе каччăсем хаваспах техни- кумра вĕренекен тата вĕрентекен ăстаçăсен ĕçĕсемпе паллашрĕç. Çăмăл машина тренажерĕпе те, автодромра инструктор йĕркелесе пынипе тĕрлĕрен машина-тракторпа та çỹресе курчĕç. Вĕренỹ заведенийĕн мастерскойĕсемпе цехĕсем кăмăла кайрĕç, кашниех çакăнти оборудованисемпе кăсăкланчĕ. Çĕвĕ цехĕнче Ю. Тинюкова преподаватель мастер-класс кăтартрĕ. Усă курман джинс шăлавартан вĕри савăтсем тытмалли хатĕр, кухньăра куллен усă курмалли саппун, хĕрачасем валли юбка та çĕлеме пулнине кашниех хăйĕн куçĕпе курса тĕлĕнчĕ. Çĕкленỹл- лĕ кăмăлпа тухрĕç вĕренỹ заведенийĕнчен. Хăпартланма тивĕç те пур. Пирĕн шкулта 9 класс вĕреннĕ хыççăн техникум- ра пĕлỹ пухса ăста специалист пулнă Е. Курицын паянхи кун Шупашкарти пĕр кафере аслă поварта вăй хурать. А. Акжарова Шупашкарти регионсем хушшинчи кондитерсен "Çамрăк профессионалсем" чемпионатне хутшăнса 40 вĕренỹ заведени- йĕнчен килнĕ 118 вĕренекен тата 16 çултан пуçласа 23 çула çитнĕ çамрăк специалистсем хушшинче виççĕмĕш вырăна çĕнсе илчĕ. Конкурса хутшăнакансен ĕçĕсене 150 ытла эксперт хакланă. Çакна та каласа хăвармалла: Айгульпа Женя иккĕшĕ те Республика Пуçлăхĕн стипендине тивĕçлĕ пулнă.
Аякра мар, юнашарти вĕренỹ заведенийĕнчех пĕлỹ пухса специальность илме те, чыса çĕклеме те майсем пурах-мĕн.
М. ЧЕРНОВА, социаллă педагог
Источник: "Авангард" (газета Батыревского района)