25 октября 2016 г.
Кирек хăш ĕçе юратса тусан та вăл çынна илем кỹрет, хисепе кăларать. Çапла калас килет В. Паймуллов пирки те. Вăл "Раççей Федерацийĕн тава тивĕçлĕ конструкторĕ" ята илнĕ. Тăван ялтан аякра пулнăран тăтăш килсе çỹреймест çав конструктор. Çапах та çуралса ỹснĕ кĕтесе лексен пуринпе те курса калаçас килет. Çак кунсенче вăл тăван ялĕнче шкулта пулчĕ, кунти вĕрентекенсемпе, вĕренекенсемпе тĕл пулу ирттерчĕ.
Валентин Иванович ялта 7 çул вĕреннĕ. Патăрьелĕнчи вăтам шкулта алла аттестат илнĕ хыççăн Мускаври автомеханика институтне те мал ĕмĕтлĕ пулнипех, чун туртнипех кайнă. Салтак тивĕçне пурнăçланă хыççăн Ярославль хулинчи моторсем тăвакан заводра конструктор пулса ĕçлеме тытăннă. Кунтах çемье çавăрнă, ача-пăчаллă, мăнуксемлĕ пулнă. Тивĕçлĕ канăва кайнă пулин те паянхи кунчченех хăйĕн ĕçне юратса, чунтан парăнса ĕçлекен конструктор стройра.
Хăй çинчен каласа пама ыйтсанах, Валентин Иванович тỹрех Мухтав орденĕн тулли кавалерне _ Порфирий Герасимович Карикова аса илчĕ: "Манăн аннен, Зоя Герасимовна Карикован, шăллĕ вăл. Çын пулма кукка нумай пулăшрĕ, вĕрентрĕ. Яланах унран тĕслĕх илеттĕм", терĕ.
Сăкăтри вăтам шкулта П. Карикова хисеплесе Хисеп хăми уçнă. Музейра ятарлă кĕтес йĕркелени Валентин Ивановича савăнтарчĕ. Чăн-чăн паттăрăн ятне шкулта манмаççĕ, уроксенче те, класс тулашĕнчи занятисенче те час-часах ырăпа аса илеççĕ. Тĕрлĕ спорт ăмăртăвĕсем те ирттереççĕ ун ячĕпе.
_ Порфирий Герасимовичăн мăшăрĕ, Надежда Павловна та ялти шкул пурнăçĕпе питĕ интересленет. Çемьепе ун патĕнче Витебскра кашни çулах пулатпăр. 85 çулхи юбилейне паллă турăмăр, _ тет Валентин Иванович.
Н. ВАСИЛЬЕВА
Источник: "Авангард" (газета Батыревского района)