21 октября 2016 г.
КИРЕК мĕнле хулăна та çамрăк чухне çеç авма аван. Паянхи çамрăк ăру пур енĕпе те аталанса ỹстĕр тесен çивĕч ăспа юнашар спортпа çывăх пулни те кирлĕ. Патăрьелĕнчи "Паттăр" физкультурăпа спорт комплексĕнче тăрăшакан Ильфак Алеев опытлă тренер-преподаватель çулсеренех алă вăйне виçессипе тупăшакан спортсменсене ăста хатĕрлет. Темиçе кун каялла çеç Шупашкарта армрестлинг енĕпе иртнĕ уçă чемпионатра çакна вĕсем тепĕр хут çирĕплетсе панă. Мари Элпа Тутар Республикинчен, Пенза тата Чĕмпĕр облаçĕсенчен пысăк ăмăртăва пуçтарăннă 120 спортсмен хушшинче Н. Аппаковапа (Патăрьелĕнчи пĕрремĕш шкул) Г. Камалтдинова (Ыхра Çырми) республика чемпионĕсем пулса таврăннă! Л. Мясогутова, И. Янтыкова, Ф. Абелдеева, И. Янтыков, И.Тумаков (Шăнкăртамри пĕрремĕш шкул), А. Яковлева (агротехникум) вара виççĕмĕш вырăнсенче.
Пĕтĕмĕшле илсен команда кăтартăвĕ те начар мар. Çамрăк спортсменсем Патăрьелне призлă вырăнпа кăмăлтан таврăннă.
Юлашки çулсенче пушшех те анлă сарăлнă армрестлингăн спорт аренине çамрăксене явăçтарас тĕлĕшпе 28 çул тренерта тăрăшакан Ильфак Фиркатович пысăк вăй хунине те палăртса хăвармалла.
Источник: "Авангард" (газета Батыревского района)