14 октября 2016 г.
Патăрьелĕнчи иккĕмĕш вăтам шкулта хăрушсăрлăх уйăхлăхне ачасем хастар хутшăнчĕç. Çавна май кунта тĕрлĕ викторина, конкурс, тĕл пулу, мероприятисем ирттертĕмĕр.
Ĕç планне маларах туса çирĕплетнĕччĕ. Л. Еслюкова библиотекарь "Светофор", "Пушар хăрушсăрлăхĕ", "Террора хирĕçле ĕçсем", "Тĕпре _ çирĕп-кăмăл" темăсемпе информаци кĕтесĕ йĕркелерĕ. Унпа ытларах кĕçĕн тата вăтам классенче вĕренекенсем кăсăкланчĕç. Класс ертỹçисем çул-йĕр правилисемпе, вут-çулăмпа асăрхануллă пулмаллипе, çутçанталăкра пулакан пулăмсенче хăйсене мĕнле тытмаллипе паллаштарчĕç.
А. Хамитова медицина сестри пĕрремĕш пулăшу тĕрĕс парасси, васкавлă пулăшу машинисене чĕнме пĕлесси çинче чарăнса тăчĕ, ачасен ыйтăвĕсем çине хуравларĕ.
Директор çумĕ С. Кальметов кĕтмен çĕртен пулакан пулăмсем пирки видеороликсем, презентаци кăтартрĕ. Çавăн пекех класс ертỹçисемпе Патăрьелĕнчи пушар хуралĕнчи музейра экскурсинче пулчĕç, тĕл пулусем йĕркелерĕç.
Рисовани учителĕ А. Софронов "Эпир çĕр çинчи хăрушсăрлăхшăн" темăпа ỹкерчĕксен конкурсне йĕркелерĕ. Кунта уйрăмах Е. Сафьянова, К. Алякина, А. Сельцова, В. Черненко, Д. Дюкина палăрчĕç.
Вĕренекенсем çавăн пекех асра тытмалли пĕлỹсен пĕчĕк кĕнекине те туса хатĕрлерĕç. О. Цыганов, А. Полякова, И. Имеркина, Д. Дюкина ĕçĕсем паха пулчĕç.
Гражданла хỹтĕлев енĕпе йĕркеленĕ викторинăра А. Поляков, О. Цыганов, К. Иванов, П. Музяков, Б. Шестаков, А. Торговцев нумай та тĕрĕс хуравсем пачĕç.
Л. Перхиева аслă вожатăй йĕркеленĕ "Хĕрлĕ, сарă, симĕс" конкурсра А. Румянцев, Д. Тухфетуллов, С. Павлов çĕнтерỹçĕсем пулчĕç.
Уйăхлăха вĕрентỹ эвакуацийĕпе пĕтĕмлетнĕ май кĕске вăхăтра ачасем шкул стадионне пуçтарăнчĕç. "Вут-çулăмран" тĕрĕс-тĕкелех тухма пултарчĕç вĕсем.
Район администрацийĕн ятарлă программăсен секторĕн ертỹçи Г. Каллин, пушар хуралĕн аслă инспекторĕ А. Симуков, П. Думилин ликвидатор хăйсен ĕçĕ-хĕлĕпе паллаштарчĕç
В. АНТИПОВ
Источник: "Авангард" (газета Батыревского района)