30 сентября 2016 г.
Раççейри Кино çулталăкĕнче хă-йĕн 90 çулхи юбилейне паллă тума Патăрьелĕнчи В. Седойкина кăмăллă та пулчĕ. Виталий Васильевич çак отраслĕн ветеранĕ. Вăл районти киносетьре çур ĕмĕре яхăн ĕçленĕ.
Кино кăтартасси _ çăмăл ĕç мар. Çемьепе пĕрле канаймастăн. Çын кинотеатра канмалли кунсенче ытларах çỹрет. Тата каçхи ĕç. Икшер сериллĕ инди кинофильмĕсем çур çĕрчченех тăсăлатчĕç. Куракансем килĕсене саланнă хыççăн та ĕç пĕтмен. Кинолентăсене ирпе ирех ытти ялсене ăсатма хатĕрлесе хумалла тата ытти те.
Чăтăмлă пулнă иртнĕ ĕмĕр çыннисем. Пурнăç вĕсене çирĕплĕхе хăнăхтарнă. Шкулта сакăр класс вĕреннĕ Виталий Васильевич. Çул çитсен Хĕрлĕ çар ретне тăнă. Саратов облаçĕнчи Елшанка ялĕнче малтанхи хăнăхусене илнĕ. Пĕрремĕш Украина фронтĕнче пулеметчик пулнă. Киев, Житомир, Орел хулисене ирĕке кăларма хутшăннă. Бук юханшывĕ хĕрринче йывăр аманнă. 1944 çулхи август уйăхĕнче вара, сывлăхĕ хавшанине пула, яла таврăннă. Акă мĕнле аса илет-ха ăна ветеран: «Киле Канашран çуран çитрĕм. Картишĕнчи йытă тỹрех палласа илчĕ. Пỹрте кĕтĕм те _ никам та çук, алăксем уçă. Аннене шыраса пахчана тухрăм. Анне йăрансем хушшинче тăрмашать. Мана палламарĕ-ха. Çывăхарах пытăм та «Эпĕ ку, анне, сывах эпĕ», _ тетĕп. Анне йăванса кайрĕ. Аре, эпĕ вилнĕ тесе хут илнĕ пулнă-ха та вĕсем. Халĕ те çав хута усратăп-ха. Турă мана çавăншăн вăрăм ĕмĕр парнелерĕ пуль», _ тет Виталий Васильевич.
Ĕçе вырнаçса тĕпленнĕ хыççăн В. Седойкин Вера Петровна медсестрапа пĕрлешнĕ. Пĕрлехи пурнăçра вĕсен виçĕ ывăл çуралнă. Вĕсем те тăван ялтах пурăнаççĕ.
Паян Седойкинсем мăнукĕсемпе тата кĕçĕн мăнукĕсемпе савăнса, киленсе пурăнаççĕ.
Çитĕнекен ăру аслашшĕпе асламăшĕнчен ырă тĕслĕх илет. Каласа памалли, тĕлĕнтермелли сахал мар ватăсен. Республикăри тĕп архив та Кино çулталăкне халалласа «Чувашия. Кинематограф. Из века в век» электронлă сборник кăларма хатĕрленет. Унта Виталий Васильевичран илнĕ интервью та пулмалла. Çемье альбомĕнчи сăн ỹкерчĕксене тата награда докуменчĕсене те кĕртнĕ. Хĕпĕртемелĕх пур çакăншăн. Паян унăн кăкăрне «Çарти хастарлăхшăн», «Тăван çĕршывăн Аслă вăрçи вăхăтĕнче Германие çĕнтернĕшĕн», Жуков тата ытти медальсем илемлетеççĕ. Мирлĕ пурнăçра та харсăр пулнă çĕршыв хуралçи. «Районти чи лайăх киномеханик», «Пилĕкçуллăх ударникĕ» сумлă ятсене тивĕçнĕ Виталий Васильевич. Обществăлла ĕçсене сахал мар хутшăннă. Ял тăрăхĕн депутачĕ те пулнă вăл. Республикăри киноотраслĕн ветеранне ăшă саламсем сахал мар килеççĕ. Урамра тĕл пулакан иртен-çỹрен те ун умĕнче пуç таять. Кунтан сумли тата мĕн пултăр.
А. ИВАНОВА
Источник: "Авангард" (газета Батыревского района)