15 июля 2016 г.
Çын пуласси ачаранах паллă текен ваттисен каларăшне паянхи кун та ниепле те хирĕçлеймĕн. Патăрьелĕнчи пĕрремĕш вăтам шкулта вĕренекен А. Кириллова ача чухнех хăйĕн пултарулăхне пур енлĕн туптанă: вĕренỹре те, спортра та, обществăлла ĕçре те... Çавăнпа та вăтам шкултан ылтăн медальпе вĕренсе тухнă чиперккене аслă шкулта пĕлĕвне малалла тăсма та йывăр пулман. Анна Владимировна паян Чăваш патшалăх университечĕн информатикăпа шутлав техникин факультечĕн тăваттăмĕш курс студентки. Вăл хăйсен группинче çеç мар, университетра та пур енĕпе пултаруллă та ăслă, матур хĕрача. Вĕренỹре питĕ лайăх ĕлкĕрсе пырать, тĕрлĕрен проектпа наука конференцийĕсене хастар хутшăнать, пушă вăхăтра студентсен музыка коллективĕнче бас-гитарăпа сценăсем çине тухать тата ытти те. Аннăн мĕн пур пултарулăхне шута илсех ĕнтĕ ăна Раççей Президенчĕн стипендине илме тăратнă та. 47 хушамат хушшинче пирĕн район хĕрĕ _ Анна Кириллова пулни _ ашшĕпе амăшĕшĕн, тăванĕсемшĕн çеç мар, пуриншĕн те кăмăллă. Сăмах май каласан, 2011 çулта вăл аслă класра вĕреннĕ чухнех творчествăри ăнтăлушăн Чăваш Республикин Пуçлăхĕн стипендине тивĕçнĕ. Ăнăçу сана, Анна!
Источник: "Авангард" (газета Батыревского района)