21 июня 2016 г.
Çак шухăша Патăрьелĕнче пурăнакан Такмаковсем пĕр сăлтавсăрах çирĕплетмеççĕ. Елизавета Антоновнăпа Владимир Георгиевич çемье çавăрса пурăнма пикенни çак кунсенче 55 çул çитрĕ. Мăшăрлă пурнăçпа икĕ пил- лĕклĕ цифра патне çитиччен çăмăл пулманни паллă ĕнтĕ. Çак тапхăрта пилĕк ача ашшĕпе амăшĕн шурипе хурине самай черетлеме тивнĕ.
Саккăрмĕш теçетке тултарнă Владимир Георгиевич сакăр класс вĕренсе тухнă хыççăн пĕлĕвне Улатăрти вăрман техникумĕнче малалла тăснă. Салтак аттине тăхăниччен техник-механик дипломне илнĕ. Салтак тенĕрен, ветеран вăл вăхăтсене питĕ ырăпа аса илет. 1952 _ 1955 çулсенче Китайра службăра тăнă кĕçĕн сержант салтак тивĕçне тỹрĕ кăмăлпа пурнăçланăшăн "Китайско-Советская дружба" текен медале тивĕçнĕ. Маудзедун хăй аллине тыттарнă награда унăн çемье архивĕнчи ытти парнесем хушшинче сумлисенчен пĕри шутланать.
Ĕç ветеранĕ пурнăç тăршшĕпех чыслă та хисеплĕ ентешсен ушкăнĕнче. Техник-механик вăтăр çул ытла ПМК_4 "Чувашмелиорация" мехколоннăра тăрăшнă. Специалист коллектившăн кăтартуллă ĕçчен пулнă. Каярахпа техника юсакан предприятире ĕç стажне малалла тăснă. Владимир Георгиевич паян та май пур таран çамрăксене хăйĕн сĕнĕвĕпе пулăшать. Çулсем шултăраланас енне сулăннă пулин те опытлă наставник шкул ачисемпе те тĕл пулать, вăрçă хыççăнхи çăмăл мар пурнăç пирки каласа парать...
Такмаковсем мăшăрĕпе пилĕк ача çуратса ỹстернĕ. Вĕсен кашнийĕнех хăйсен ăшă йăви пур пулин те, ашшĕпе амăшĕ патĕнче час-часах пулаççĕ. Амăшĕ, Елизавета Антоновна, ултă мăнукне те çулла хăйĕн тавра пуçтарать. Опытлă педагогăн вĕсене ачисем пекех тĕрĕс çул çине тăратма опыт та, мехел те çителĕклĕ-ха.
А. ЕГОРОВА
Источник: "Авангард" (газета Батыревского района)