03 июня 2016 г.
Патăрьелĕнчи иккĕмĕш вăтам шкулта ачасене хăрушлăха парăнтарма, çут çанталăк пулă- мĕсенчен асăрханма, вут-çулăма хирĕç кĕрешме, инкек-синкекрен тухма хăнăхтарассине тĕпе хурса ĕçлеççĕ. Çавна май кунта тĕрлĕ мероприяти ирттереççĕ. ОБЖ урокĕсенче кирлĕ пĕлỹ параççĕ.
Чăваш Республикин вĕрентỹ тата çамрăксен политикин министерствин хушăвĕпе хăрушсăрлăх урокĕ иртрĕ. Унта пушар хуралĕн начальникĕ А. Викторов хăйсен ĕçĕ-хĕлĕпе паллаштарчĕ. Пушарта кĕрешмелли техникăна курни те лайăх. Ю. Воробьев кунти музея кăтартрĕ. Район администрацийĕн ятарлă программăсен секторĕн ертỹçи Г. Каллин пулса иртнĕ инкексем пирки чарăнса тăчĕ. Шăрпăкпа асăрхануллă пулмаллине çирĕплетсех каларĕ.
Ачасене пушарниксен тумне тăхăнса пăхни кăмăла кайрĕ, вĕсен ĕçĕ-хĕлĕпе, машинăсемпе кăсăкланчĕç, диспетчер пункчĕпе паллашрĕç. Хăйсен ыйтăвĕсем çине тĕрĕс те тулли хуравсем илчĕç вĕсем.
В. АНТИПОВ
Источник: "Авангард" (газета Батыревского района)