27 мая 2016 г.
Салтак аттине тăхăннă, пăттине çисе курнă çынна яланах "тĕнче курнă" тесе хак панă. Тăван çĕршыв умĕнче хăйĕн тивĕçне пурнăçлакан паян та хисепре.
Пирĕн урамра тата хамăр таврара пурăнакансем пурте тенĕ пекех ĕнерхи салтаксем. Акă, Владимир Поляков _ пограничник, ывăлĕ _ Дмитрий Владимирович та тинĕс-çар пограничникĕ. Уяв умĕн мăшăрĕн _ Надежда Александровнăн _ мăнаçланмалăх, çемье членĕсене чикĕ хуралçисен кунĕпе саламлама сăлтавĕ пысăк.
Салтак тивĕçне чыслăн пурнăçланă ытти юлташсем умĕнче те паян пуçа çеç таймалла. Владимир Скворцов _ пограничник, Николай Николаев танк командирĕ пулнă. Унăн Володьăпа Дима ывăлĕсем те тинĕс чиккине сыхланă. Василий Николаев танк ротинче службăра тăнă. Сăмах май каласан, Патăрьелĕнчи çар комиссариачĕ умĕнчи ИС_ 3 йывăр танка Канашран шăпах Василий Григорьевич çỹреттерсе килнĕ. Ытти кỹршĕсем те икĕ е виçĕ çул хăйсен Конституци тивĕçне пурнăçласа çарта пулнă. Борис Табаков _ моряк, Владимир Уруков _ механик-водитель тата ытти те. Урăхла каласан, ĕнерхи салтаксем паянхи çамрăксемшĕн ырă тĕслĕх вырăнĕнче.
Халĕ шăпах районта çуркуннехи призыв кампанийĕ пырать. Паянхи куна 43 çамрăка районти çар комиссариачĕ умĕнчен ырă сунса салтака ăсатнă. Каччăсем пурте тăван çĕршывăн шанчăклă хуралçисем пулччăр, аслă пиччĕшĕсенчен ырă тĕслĕх илччĕр.
Вулакана пĕлме
Юхмапа Пăла тăрăхĕнче "Пограничное братство" обществăна А. Быков ертсе пырать. Паянхи куна чикĕ хуралĕнче тăнă салтаксем пине яхăн. 2013 çулта районти ветеран-пограничниксене халалласа Патăрьелĕнче палăк уçнă.
А. ЛЕОНТЬЕВ, ĕç ветеранĕ. Патăрьел ялĕ
Источник: "Авангард" (газета Батыревского района)