06 мая 2016 г.
Юхмапа Пăла тăрăхĕ яланах хăйĕн ĕç паттăрĕсемпе мăнаçланнă. Районта Ĕç çынни çулталăкĕнче вĕсене ятран асăнма, тава тивĕçлĕ ĕçченсен умĕнче пуç тайма майăн 1-мĕшĕнче тепĕр меллĕ самант пулчĕ.
Район администраци пуçлăхĕ Рудольф Селиванов ăшă салам сăмахне каланă май, çак уяв шăпах пысăк туйăмлă çынсене, хăйсен ĕçне парăнса, юратса ĕçлекенсене, хамăр тăван еншĕн чунне парса тăрăшакансене пĕрлештерсе тăнине палăртрĕ. Пире улăштаракан çитĕнекен çамрăк ăрушăн ĕçпе палăрнă кăтартуллă çынсем районта сахал мар. Вĕсенчен пиллĕкĕшĕ çак кун уçнă "Мухтав аллейине" çырăннă _ Илларион Евдокимович Перепелкин, Михаил Герасимович Долгов, Николай Васильевич Каргин, Василий Антонович Никитин, Матрена Дмитриевна Цветкова _ Социализмла ĕç геройĕсем. Унсăр пуçне уяв тĕлне вунă е тата ытларах çул агропромышленность комплексĕнче ертỹçĕ пулса тăрăшнă хастарсен ячĕпе уçнă сăн ỹкерчĕксен куçса çỹрекен куравĕ те ĕç паттăрĕ- сен пысăк "çарне" çирĕплетсе парать.
Çавăн пекех Çуркуннепе Ĕç уявне пуçтарăннисене Патăрьел ял тăрăх пуçлăхĕ А. Моисеев, "Россемена" тулли мар яваплă обществăн генеральнăй директорĕ, хисеплĕ ентеш В. Нягин, нумай çул "Труд" хуçалăхне ертсе пыракан Н. Михайлов саламларĕç, пурне те тăнăç пурнăç, килĕшỹ, пысăк юрату сунчĕç.
Салам сăмахĕсем хыççăн район администраци пуçлăхĕ Рудольф Селиванов сăн ỹкерчĕксен куравне, паттăрсене халалланă Мухтав Аллейине тунă ĕçе хастар хутшăннă ĕçченсене Тав хучĕсем, вăрçă участникĕсен çемйисене пурăнмалли условисене лайăхлатма сертификатсем парса чыс турĕ.
А. НИКОЛАЕВ
Источник: "Авангард" (газета Батыревского района)