25 марта 2016 г.
Патăрьелĕнчи Дружба урамĕнчи икĕ хутлă çуртра пурăнакан çамрăк хĕрарăм çак пăтăрмахăн вĕçне-хĕрне тухас, тỹс- нĕ тăкаксене саплаштарас тĕллевпех чăн малтанах роспотребнадзора заявленипе тухнă, ун хыççăн хăйсен çуртне пăхса тăракан, электрохуçалăха ертсе пыракан кантурсене хăйĕн пăшăрханăвне çитернĕ. "Пăрĕ" тỹрех тапранманран вара харпăрлăхçă çивĕч пероллисемпе, журналистсемпе, ыйтăва çĕкленĕ. Кун пирки çак кунсенче çеç "Про Город" текен республика хаçатĕнче те материал пичетленчĕ. Икĕ ача амăшĕ хăйĕн чун ыратăвне пирĕн пата та çитерчĕ.
Ĕçĕ-пуçĕ вара акă мĕнпе çыхăннă. Февралĕн 18-мĕшĕнче мĕнле çанталăк пулнине вулакансем ас тусах каймаççĕ-тĕр. Çак çиллĕ-тăвăллă каçхине асăннă урамри 18-мĕш çуртра пурăнакансен электроçутă çине-çинех выляма, сикме пикеннĕ. Пĕр хваттерте электропăралук ирĕлме те пуçланă-мĕн. Хыпăнса ỹкнĕ харпăрлăхçăсем хăшĕсем тỹрех çутта сỹнтерсе хунă, теприсем лару-тăру лайăхланасса шанса тăхтаса тăнă курăнать. Çакнашкал пăлхавлă самантра вуннăмĕш хваттерте пурăнакан çемьен йăлара усă куракан йышлă техники çунса кайса юрăхсăра тухнă. Вăл шутра хаклă йышши вĕр çĕнĕ япала çăвакан машина, шыв ăшăтакан 80 литрлă электроприбор, спутник турилкин, компьютерăн уйрăм япалисем... Юрать-ха, ватă амăшĕ газ кăмакине сỹнтерсе ĕлкĕрнĕ. Çапла вара темиçе минут хушшинчех 50 пин ытла тенкĕлĕх йăлари техникăн "чĕри" тапма чарăннă! Хваттер хуçисем тепĕр куннех пĕри те тепри çурта пăхса тăракан, электроэнергипе тивĕçтерекен компанисем патне çырупа тухнă, кăлтăкăн, айăпăн диагнозне лартма ыйтнă. Энергетиксем те, çурт управляющин специалисчĕсем те çыру йĕрĕпе пырса тĕпченĕ. Анчах та кунта пурăнакансем çирĕплетнĕ тăрăх, камăн участокĕнчи кăлтăкпа çынсем шар курнине пĕри те каламан. Юпаран çурт патне çитичченхи электролинишĕн районти энергетиксем, çуртран подъездсенчи счетчик патне çитиччен "Чистое село" управляющи яваплă-мĕн. С. Павлова хваттер хуçи (ỹкерчĕкре), унпа пĕрлех ытти хваттер хуçисем те тĕрĕслĕхе çиеле кăларса тăкаксене саплаштарас тĕллев-пех ĕç-пуçа саккун хуралне çитернĕ те. Судра вара вĕсен ĕнентерсе, çирĕплетсе памалли сахал мар пулать-ха.
А. НИКОЛАЕВА
Источник: "Авангард" (газета Батыревского района)