18 марта 2016 г.
Информаци кунĕн пĕрремĕш ушкăнĕ _ район администраци пуçлăхĕ Р. Селиванов, Ю. Исаевпа И. Данилов _ чăн малтан Патăрьелĕнчи пĕрремĕш вăтам шкулта пулса "Ĕçе мухтакан" илемлĕх галерейипе паллашрĕç.
Патăрьелĕнчи пĕрремĕш вăтам шкулта вĕрентекенсем çитĕнекен ăрăва пурнăç çулĕ çине тухма хатĕрленĕ май хăйсене килĕшекен професси суйласа илес, ун патне хурăнакан сукмака хывма пулăшас тĕллевпе пысăк ĕç тăваççĕ: класс тулашĕнчи мероприятисене аслисене чĕнсе тĕл пулусем ирттереççĕ, вырăнта анлă сарăлнă професси ĕçченĕсем патне экскурсисене тухаççĕ... Чăваш Енри Ĕç çынни çулталăкĕнче туса ирттерекен пархатарлă ĕçсем те пур. Ку хутĕнче илемлĕх галерейин "Ĕçе мухтакан" пайне уçни çакнах çирĕплетет.
Каласа хăварни те вырăнлă пуль. Малтанхине Тăван çĕршывăн Аслă вăрçинче çĕнтерỹ тума пулăшакансене халалланă. Унта вырнаçтарнă ỹкерчĕксен айне чуна çỹçентерекен сăвă йĕркисене çырнă. Çамрăк экскурсоводсем те пур. Кашни ỹкерчĕк тĕлĕнчех вĕсем чăвашла та, вырăсла та, тутарла та ăнлантарса вăрçă вăхăтĕнчи йывăр пурнăçа сăнлакан эпизодсене куç умне кăларса тăратма май параççĕ. Ырă пуçарăва йĕркелеме республикăри "Радуга" обществăлла организаци пулăшнă.
Галерея уçма пухăннисене хор коллективĕсен республикăри пĕрремĕш конкурсĕн çĕнтерỹçисем "Эпир çăкăр çитĕнтерекенсем пулатпăр" (илемлĕх ертỹçи Чăваш Республикин тава тивĕçлĕ культура ĕçченĕП. Никитин) юррипе кĕтсе илчĕç. Вĕренекенсем Чăваш Республикин тава тивĕçлĕ учителĕ А. Майрина ертсе пынипе литмонтаж хатĕрленĕ.
Ăста ỹнерçĕсен 15 картини чăннипех те паха. Вĕсем тăрăшуллă халăх ĕçе юратнине уççăн çирĕплетеççĕ. Пĕрлех шкул ачисен ỹкерчĕкĕсем те галерейăна пуянлатаççĕ. Ĕç паттăрĕсен сăн ỹкерчĕкĕсем вара хĕрсемпе каччăсене вĕсен тĕслĕхĕпе ỹссе çитĕнме хавхалантараççĕ.
Район администраци пуçлăхĕ Р. Селиванов Патăрьелĕнчи пĕрремĕш вăтам шкул яланах пĕрремĕш пулнине, тĕрлĕ конкурсра çĕнтерсе ырă тĕслĕх кăтартнине, проектсене хутшăнса çитĕнекен ăрăва воспитани парас ĕçре мĕн кирлине пама пултарнине палăртрĕ. Коллектив малашне те мал ĕмĕтлĕ пуласса шаннине пĕлтерчĕ.
"Вĕрентекенсем пĕчĕк çынна пурнăç мĕнлерех анлă та тĕрлĕ енлĕ пулнине шкулта уçса параççĕ. Ачасен таланчĕпе пултарулăхĕ шăпах кунта палăрать, кунта ĕç çыннин пуласлăхĕ йĕркеленет",_ терĕ сăмах илсе республикăри Чăваш патшалăх гуманитари ăслăлăхĕсен институчĕн директорĕ Ю. Исаев Республика Пуçлăхĕн Михаил Игнатьевăн Патшалăх Канашне янă Çырури сăмахсемпе усă курса.
Район администрацийĕн вĕрентỹ, çамрăксен политики тата физкультурăпа спорт управленийĕн начальникĕ Н. Андреева района аталантарас ĕçре вăхăтĕнче тивĕçлĕ тỹпе хывнă ĕç çыннисене пирĕн асра тытмаллине, аслă ăрурисенчен тĕслĕх илмеллине, хăçан та пулсан кирек камăн та ячĕ вĕсемпе юнашар пуласса шанмаллине палăртрĕ. Шкул директорĕ Н. Антонова галерейăна районти ытти вĕренỹ учрежденийĕсенче пĕлỹ пухакан ачасем те килсе курас ĕмĕтлине пĕлтерчĕ. Кĕçĕн Патăрьелĕнчи Социализмла Ĕç Геройĕ Матрена Дмитриевна Цветкован ывăлĕ Валерий Иванович, Патăрьел ял тăрăхĕн пуçлăхĕ А. Моисеев ĕçлекен çын çеç сумлă пулнине, 45 çул ĕç стаж пуçтарнă педагогика ĕçĕн ветеранĕ Р. Сапожникова вăтам шкул вĕренекенĕсем алла аттестат илсен тĕрлĕ аслă вĕренỹ заведенийĕнче малалла пĕлỹ пухса тăрăшуллă ĕçченсем пулнине пытармарĕ.
Юлашкинчен информушкăн Аслă Чемен ял тăрăхĕнчи вăтам шкулта кун йĕркинчи темăна малалла тăсрĕ, федераллă программăпа килĕшỹллĕн тĕпрен юсанă спорт залĕ- пе медицина учрежденийĕсем, ача сачĕсем мĕнле ĕçленипе паллашрĕ.
А. АСТРАХАНЦЕВА
Источник: "Авангард" (газета Батыревского района)