20 февраля 2016 г.
Эпир Патăрьелĕнчи пĕрремĕш вăтам шкулта вĕренекенсем В. Солдатов учительпе Татмăшра пурăнакан Чăваш Республикин ял хуçалăхĕн тава тивĕçлĕ механизаторĕ В. Царев патĕнче пултăмăр. Ĕçпе чапа тухнăскертен тĕлĕнмелли пурах. Унăн ячĕ таврана саланнă. Владимир Ефремович 1979 çулта çамрăк чухнехи тăрăшуллă ĕçшĕн СССР Верховнăй Совет Президиумĕн Указĕпе килĕшỹллĕн Ĕç Мухтавĕн орденне тивĕçнĕ. Çав çулах "За преобразованье Нечерноземья в РСФСР" хисеп палли илнĕ. Социализмла ăмăрту çĕнтерỹçи те вăл. 1980 тата 1985 çулсенче вара ентешĕмĕре "Ял хуçалăх аталанăвĕнче тунă çитĕнỹсемшĕн" ВДНХ медалĕпе наградăлаççĕ. Çавăн пекех В. Царев Чăваш Республикин ял хуçалăх профессийĕсен социализмла ăмăртăвĕнче мала тухнăшăн, çак отрасльте ĕçлекенсен профсоюз обкомĕн Президиумĕн грамотипе дипломне илме тивĕç пулать.
Хастар ĕçчен Тăван çĕршывăн Аслă вăрçă участникĕн çемйинче çуралнă, çамрăклах ĕçе явăçнă. Çар службинче пулнă хыççăн тăван хуçалăхра комбайнерта вăй хума пикеннĕ. Ĕç ăсталăхне пула ăна малтанах механизатора шанаççĕ, 1991 çулта вара инженера лартаççĕ. Кунта вăл 2002 çулччен ĕçлет. Каярахпа ăна шăпа тăван шкула илсе çитерет. Унта директорăн хуçалăх енĕпе ĕçлекен çумĕнче тăрăшать.
Владимир Ефремович Галина Георгиевна мăшăрĕпе 3 ача пăхса çитĕнтереççĕ. Кил хуçи хĕрарăмĕ алă ĕç ăсти те. Çуртра вырăн тупнă кавирсемпе тĕрĕсем çемье вучахне тата ăшăлăх параççĕ.
Пенсире пулин те Царевсем çĕрпе ĕçлеме пăрахмаççĕ. Хăйсем трактор та туяннă. Унпа гектар çĕре сухалаççĕ, акаççĕ, çимĕç çитĕнтереççĕ. Кирлĕ пулсан, ыттисене те пулăшаççĕ.
Р. ВАЛИТОВА, Р. СОЛДАТОВА
Источник: "Авангард" (газета Батыревского района)