27 января 2016 г.
Массăллă информаци хатĕрĕсенчен сысна грипне пула Украинăра çынсем вилнине чылайăшĕ илтнĕ пулĕ. Çак усал чире пула алла яхăн çын пурнăçран уйрăлнă. Хăрушă амак никама та тиркеменнине специалистсем тахçанах чан çапаççĕ. Пирĕн республикăра та çак йышши грипп чирĕпе аптранисене тупса палăртнă. Роспотребнадзорăн республикăри управленийĕн информацийĕ тăрăх иртнĕ эрнере çак сăлтавпа шурă халатлисен аллине çакланнисем виççĕн пулнă.
Юлашки кунсенче республикăра респираторлă вирус инфекцийĕпе чирлисен шучĕ ỹссех пынине те калаççĕ. Çавăнпа та пурин те унтан асăрханса мĕн пур гигиена йĕркисене пăхăнмалла, пỹлĕмсене уçăлтармалла, çын йышлă çỹрекен вырăнсене тухсан маска тăхăнни те вирус сирĕн çумăра çулăхасранах сыхлать. Паллă ĕнтĕ, кирек мĕнле чиртен те асăрханма çăмăлтарах, сипленме вара вăхăчĕ те чылай кирлĕ, укçи-тенки те самай шăлăнать.
Источник: "Авангард" (газета Батыревского района)